ՀՀ նախագահ Սերժ Սարգսյանն ուղերձ է հղել Հայոց ցեղասպանության զոհերի հիշատակի օրվա առթիվ։
ՀՀ նախագահի մամուլի գրասենյակից NEWS.am-ին հայտնում են, որ ուղերձում ասվում է.
«Սիրելի՛ հայրենակիցներ,
Այսօր ապրիլի 24-ն է՝ Հայոց ցեղասպանության զոհերի հիշատակի օրը: Մենք խնկարկում ենք հիշատակը մեր սրբադասված նահատակների: Տեղահանության քողի տակ իրականացված եղեռնը Օսմանյան կայսրության պետական ծրագիրն էր, որ ի կատար ածվեց բացառիկ, մինչ այդ չտեսնված դաժանությամբ եւ հետեւողականությամբ:
1915 թվականի ապրիլի 24-ին հազարամյակներով չափվող հայոց պատմությունը բաժանվեց երկու մասի` մինչեւ այդ ողբերգական տարեթիվը եւ դրանից հետո: Հրաշքով փրկված արեւմտահայության բեկորները սփռվեցին աշխարհով մեկ` դառնալով սփյուռքահայություն:
Հայության նյութական, մշակութային եւ քաղաքական կորուստներն անչափելի են, բայց ամենամեծ կորուստը մարդիկ են, որոնք կրողն էին հինավուրց, հարուստ եւ ինքնատիպ քաղաքակրթության:
Մեր` ապրողներիս պարտքն է ոչ միայն հիշել ու հարգել նրանց, այլեւ ապրել, աշխատել ու պայքարել կրկնակի ավյունով՝ նաեւ նրանց փոխարեն: Ապրել, աշխատել ու պայքարել կենսահաստատ աշխարհայացքով` հավատալով բարուն, մարդկայնությանը եւ արդարությանը:
1915 թվականի այդ հրեշավոր ամսաթվից անցել է արդեն մեկ դարից ավելի: Մենք գիտենք, թե ինչերի միջով ենք անցել այս ընթացքում եւ գիտենք, որ հաղթել ենք մահին: Արցախյան հերոսամարտը վկայությունն է եւ ապացույցը, որ նոր ցեղասպանություն մենք թույլ չենք տալու: Այլեւս երբեք թույլ չենք տալու:
Հայ ժողովրդի վերածնունդն իրականություն է, եւ այն իրականություն դարձավ վերապրող ժողովրդի զավակների շնորհիվ: Հայոց պետականության վերականգնումը հայրենի հողի վրա իրականություն դարձավ այդ զավակների շնորհիվ, հայ մշակույթի եւ գիտության վերազարթոնքն իրականություն դարձավ այդ զավակների շնորհիվ:
Այս ընթացքում մենք աշխարհին պարգեւեցինք ստեղծագործ մտքի հանճարների մի ամբողջ աստղաբույլ: Նաեւ մեծանուն հայերի միջոցով աշխարհը տեղեկացավ, թե ինչ է կատարվել մեզ հետ եւ իմացավ, որ նրանք զավակներն են բնաջնջման եզրին հայտնված ազգի:
Ես այս ամենը թվարկում եմ ընդգծելու համար մեր ժողովրդի հսկայական կենսական ու ստեղծագործ ներուժը եւ իմ անսասան հավատը մեր հնարավորությունների եւ վաղվա օրվա հանդեպ: Այո՛, 1915-ին մենք հայտնվեցինք դժոխքում, բայց եթե դեպի կյանք վերադառնալու ճանապարհին մենք մեր մեջ ուժ ենք գտել նման մեծագործությունների, ապա անկախ պետականության պայմաններում՝ 21-րդ դարում ի զորու կլինենք անելու ավելին:
Այսօր՝ ապրիլի 24-ին, Հայոց ցեղասպանության զոհերի հիշատակը խնկարկելու օրը, մենք բարձրանալու ենք Ծիծեռնակաբերդի բարձունք կամ այցելելու ենք այլ հուշարձաններ Հայաստանի տարբեր բնակավայրերում եւ արտերկրում: Հիշենք, որ այս ամենամյա երթը երթն է վերածնված ժողովրդի, որ չի մոռացել, թե ինչ է թողել ետեւում, բայց վստահությամբ նայում է առաջ:
