Եվրոպայի խորհրդի խորհրդանական վեհաժողովի այսօրվա նիստն աննախադեպ ընթացք է ունեցել. նիստում պահանջել են ԵԽԽՎ գործող նախագահ, ադրբեջանամետ գործիչ Պեդրո Ագրամունտի հրաժարականը։
ԵԽԽՎ-ում հայաստանյան պատվիրակության անդամ, ՀՀԿ խմբակցության պատգամավոր Սամվել Ֆարմանյանը NEWS.am-ի թղթակցի հետ զրույցում նշեց, թե ԵԽԽՎ բոլոր քաղաքական խմբերի առավոտյան նիստերը նվիրված են եղել Պեդրո Ագրամունտի շուրջ զարգացող իրավիճակին։ Բոլոր խմբերը համակարծիք են եղել, որ Պեդրո Ագրամունտն իր գործողություններով կորցրել է վստահությունը եւ, ըստ էության, գործ ունեն քաղաքական հասունացող ճգնաժամի հետ։
«Քաղաքական խմբերի նիստերից հետո Սոցիալիստների խմբակցությունը հանդես է եկել հայտարարությամբ՝ ըստ էության պահանջելով Պեդրո Ագրամունտի հրաժարականը։ Մենք, որպես ԵԺԿ խմբակցություն, համանման որոշում ենք կայացրել, որի արդյունքում Պեդրո Ագրամունտը եւ նրան ուղեկցող երկու անձինք, որոնց, Ռոբերտ Ուոլթերի եւ Միլիցա Մարկովիչի հակահայ զեկույցներից սկսած, հայ հանրությունը հիշում էր որպես ադրբեջանամետ լոբբիստների, պետք է հրապարակային բոլոր խմբերի հարցերին պատասխանեն հանրային լսումների ձեւով, որ պետք է տեղի ունենա վաղն առավոտյան»,- նշեց Ֆարմանյանը։
Նրա խոսքով՝ ԵԽԽՎ նստաշրջանն այսօր սկսվել է աննախադեպ իրավիճակով, երբ ԵԽԽՎ մեծաթիվ անդամներ, այդ թվում եւ ինքը՝ Ֆարմանյանը, պահանջել են Ագրամունտի հրաժարականը։ «Պեդրո Ագրամունտը ստիպված էր ընդհատել նիստը, 10 րոպե ընդմիջում վերցնել, բայց ընդմիջումից հետո այլեւս չվերադարձավ ԵԽԽՎ նախագահություն»,- ասաց Ֆարմանյանն ու հավելեց. «Ստեղծված իրավիճակն աննախադեպ է ԵԽԽՎ պատմության մեջ, մինչ այս երբեք նման իրավիճակ չի եղել․ կոնսենսուս կա բոլոր քաղաքական խմբերի մոտ, որ քաղաքական հասունացող ճգնաժամը պետք է հանգուցալուծվի Ագրամունտի հրաժարականով»։
Ըստ ԱԺ պատգամավորի՝ զուգահեռ ընթանում են քննարկումները՝ կապված ԵԽԽՎ կոռուպցիոն սկանդալների հետ։ Քննարկվել է անկախ արտաքին հանձնաժողով ստեղծելու հարցը, որը, հավանաբար, բաղկացած կլինի երեք հեղինակավոր անդամներից, ՄԻԵԴ նախկին դատավորների կամ նույնպիսի պատասխանատու պաշտոն զբաղեցրած անձանցից, որոնք հետաքննություն կիրականացնեն ԵԽԽՎ-ի շուրջ այս տարիներին ծավալված կոռուպցիոն սկանդալների շուրջ։
«Կարծում եմ՝ երկուսն էլ լավ նորություն են մեզ համար։ Քաղաքական ճգնաժամը կարող է հանգուցալուծվել միայն Պեդրո Ագրամունտի հրաժարականով, եւ տրամադրվածությունն էլ այնպիսին է, որ դա պետք է տեղի ունենա այս նստաշրջանի ընթացքում, մինչեւ շաբաթավերջ»,- ամփոփեց Սամվել Ֆարմանյանը։
Նշենք, որ ԵԽԽՎ-ում Ուկրաինայի պատվիրակությունը պահանջել է կառույցի նախագահ Պեդրո Ագրամունտի իմփիչմենթի գործընթաց սկսել՝ Սիրիա նրա գլխավորած պատվիրակության այցի պատճառով: Պեդրո Ագրամունտն իր հերթին հայտարարել է, որ Սիրիա իր այցելությունը սխալ էր: Ագրամունտը պարզաբանել է, որ այդ երկիր իր այցը լրատվամիջոցների կողմից շահարկումների առարկա է դարձել, նաեւ նշել, որ իր այցի մասին պարզաբանումներ է ներկայացրել ԵԽԽՎ բյուրոյին:
Նիստի ընթացքում ԵԽԽՎ ղեկավարին հիշեցրել են կոռուպցիոն մի շարք սկանդալների մասին, որոնցում նաեւ նրա անունն է շրջանառվում:
