Գլխավոր դատախազության ներկայացուցիչը «Կոնգրես-ՀԺԿ» դաշինքի հայցով Սահմանադրական դատարանի նիստում ապրիլի 2-ին կայացած խորհրդարանական ընտրությունների ընթացքում կրկնակի քվեարկության փորձերի դեպքերը «պատճառաբանել» է տեխնիկական նորամուծությունների ներդրմամբ:
Գլխավոր դատախազության հատուկ կարեւոր գործերով վարչության պետի տեղակալ Կարեն Բիշարյանի խոսքով՝ մի շարք դեպքերում տեխնիկական սարքը չի արձագանքել, հետո միանգամից կրկնակի քվեարկություն է համարել: Կամ թղթի սպառման պատճառով կտրոն չի տվել, հետո կրկին որպես կրկնակի քվեարկություն է համարել: Կամ մարդը օգնել է քվեարկել, դրա համար անձնագիր է ներկայացրել, իսկ տեխնիկան համարել է կրկնակի քվեարկության փորձ:
Կրիկնակի քվեարկության փորձի միայն մեկ իրական դեպք է գրանցվել, երբ քաղաքացին փորձել է քվեարկել ազգականի փոխարեն, հայտնել է գլխավոր դատախազության ներկայացուցիչը: Հարուցվել է քրեական գործ, մեղադրանք է առաջադրվել:
Հիշեցնենք, որ տեխնիկական նորամուծություններն իսկապես խափանումներ ունեցել են, մասնավորապես՝ մի շարք դեպքերում վատ են աշխատել հաշվող եւ նույնականացնող սարքերը: