Բրիտանիայի ու ԵՄ-ի միջեւ ապագա հարաբերությունների մասին ցանկացած պայմանավորվածություն, առեւտրի, միգրացիոն քաղաքականության նոր պայման քննարկվելու է միայն «բրեքսիթի» բոլոր պայմանները համաձայնեցնելուց հետո, այդ թվում Բրյուսելի առաջ Լոնդոնի պարտավորությունները՝ մասնավորապես եվրոպական բյուջե բրիտանական անդամավճարների հարցը։ Նման հայտարարություն է արել Գերմանիայի կանցլեր Անգելա Մերկելը, ելույթ ունենալով Գերմանիայի խորհրդարանում, փոխանցում է BBC-ն։
Ընդ որում , նրա խոսքով, շատ բրիտանացիներ պատրանքներ են տածում այն կապակցությամբ, որ Բրիտանիայի ու ԵՄ-ի ապագահ հարաբերությունները կարող են քննարկվել ԵՄ-ից երկրի դուրս գալու պայմանների մասին բանակցություններին զուգահեռ։
«Որքան շուտ Բրիտանիայի կառավարությունը պատրաստ լինի կառուցողական որոշումների, այդքան շուտ մենք կկարողանանք բավարարել նրա ցանկությունը ու քննարկել ապագա հարաբերությունները։ Սակայն նախ մենք պետք է իմանանք, թե բրիտանական իշխանությունները ինչպես են պատկերացնում այդ հարաբերությունները։ Ամեն ինչ կարող է տեղի ունենալ միայն այդ հաջորդականությամբ»,- շեշտել է նա։
