Հայաստանի արտաքին գործերի նախարար Էդվարդ Նալբանդյանը եւ Շվեյցարիայի դաշնային խորհրդական, արտաքին գործերի դաշնային դեպարտամենտի ղեկավար Դիդիե Բուրկհալտերը ուղերձներ են փոխանակել Հայաստանի Հանրապետության եւ Շվեյցարիայի Համադաշնության միջեւ դիվանագիտական հարաբերությունների հաստատման 25-ամյակի կապակցությամբ:
Հայատսանի ԱԳՆ-ից NEWS.am-ին հայտնում են, որ Էդվարդ Նալբանդյանն իր ուղերձում նշում է, որ քառորդ դարի ընթացքում երկու պետությունները ձեւավորել են գերազանց հարաբերություններ եւ սերտ համագործակցություն հաստատել տարբեր ոլորտներում։
Հայաստանի արտգործնախարարն ընդգծում է, որ Հայաստանի եւ Շվեյցարիայի միջեւ քաղաքական երկխոսությունն ամրապնդվել է՝ շնորհիվ դիվանագիտական ներկայացուցչությունների փոխադարձ հիմնադրման, բարձրաստիճան բազմաթիվ այցերի, միջազգային կազմակերպություններում, այդ թվում՝ Միավորված ազգերի կազմակերպության, Եվրոպայի խորհրդի, ԵԱՀԿ, Ֆրանկոֆոնիայի միջազգային կազմակերպության շրջանակներում սերտ համագործակցության, ինչպես նաեւ միջխորհրդարանական բարեկամական խմբերի ակտիվ գործունեության։
Էդվարդ Նալբանդյանը նշում է, որ Հայաստանը գնահատում է Շվեյցարիայի վճռական եւ շարունակական աջակցությունը Լեռնային Ղարաբաղի հիմնախնդրի բացառապես խաղաղ ճանապարհով կարգավորմանն ուղղված ԵԱՀԿ Մինսկի խմբի համանախագահների ջանքերին։
Հայաստանի ԱԳ նախարարն ընդգծում է Շվեյցարիայի աջակցությունը Հայաստանում իրականացվող զարգացման տարբեր ծրագրերին, ինչպես նաեւ գոհունակությամբ արձանագրում շվեյցարահայերի կարեւոր ներդրումը երկու պետությունների տնտեսական, մշակութային կյանքի եւ հայ-շվեյցարական բարեկամության զարգացման գործում։
Եզրափակելով ուղերձը՝ Էդվարդ Նալբանդյանը վստահություն է հայտնում, որ Հայաստանի եւ Շվեյցարիայի միջեւ բարեկամական հարաբերություններն ու համագործակցությունն առավել կամրապնդվեն ապագայում՝ համատեղ ջանքերի շնորհիվ։
Դիդիե Բուրկհալտերն իր ուղերձում ընդգծում է Հայաստանն ու Շվեյցարիան միացնող խորը բարեկամական կապերը եւ երկու պետությունների միջեւ համագործակցության նշանակալի զարգացումը վերջին քսանհինգ տարիների ընթացքում: Նա կարեւորում է Երեւանում Շվեյցարիայի Համադաշնության դեսպանության բացումը 2011 թվականին՝ երկու երկրների նախագահների մասնակցությամբ: Շվեյցարիայի արտաքին գերատեսչության ղեկավարը հատուկ անդրադարձ է կատարում 2016 թվականի փետրվարի 29-ին, ՀՀ ԱԳ նախարարի հետ միասին, երկու երկրների միջեւ մուտքի արտոնագրերի ռեժիմի դյուրացման վերաբերյալ համաձայնագրի ստորագրմանը։
Դիդիե Բուրկհալտերն անդրադառնում է նաեւ երկկողմ տնտեսական բնագավառում արձանագրված ձեռքբերումներին՝ նշելով Շվեյցարիայի առաջատար դերը Հայաստանում օտարերկրյա ուղղակի ներդրողների շարքում, ինչպես նաեւ համագործակցությունը գիտահետազոտական բնագավառում։ Նա կարեւորում է նաեւ միջխորհրդարանական համագործակցության, երկկողմ առեւտրային հարաբերությունների, ինչպես նաեւ տարբեր կազմակերպությունների եւ հիմնադրամների դերը հայ-շվեյցարական բազմոլորտ հարաբերությունների զարգացման գործում:
Դաշնային խորհրդականը նշում է, որ երկկողմ հարաբերությունները զարգացման մեծ ներուժ ունեն, հատկապես տնտեսական եւ զբոսաշրջության բնագավառում: Միեւնույն ժամանակ հույս է հայտնում, որ Հարավային Կովկասում, 2017-2020թթ համար Շվեյցարիայի զարգացման ռազմավարության շրջանակներում իրականացվելիք ծրագրերն առավել կամրապնդեն Հայաստանի հետ գործընկերությունը զարգացման ոլորտում։
Դիդիե Բուրկհալտերը վստահություն է հայտնում, որ 2018 թվականին Երեւանում անցկացվելիք Ֆրանկոֆոնիայի գագաթաժողովը առիթ կընձեռի բացահայտելու Հայաստանի գեղեցկությունը, հարուստ պատմությունն ու լեգենդար հյուրընկալությունը։
Եզրափակելով իր ուղերձը՝ արտաքին գերատեսչության ղեկավարը հայ ժողովրդին Շվեյցարիայի ժողովրդի անունից մաղթում է խաղաղ եւ բարեկեցիկ ապագա»:
