Երեւանում բոլոր ոլորտները կարիք ունեն բարելավման. լինի մանկապարտեզները, որոնք կոռուպցիայի մեջ կորած են, լինի ճանապարհները, որոնք, չգիտես, ինչու հենց ընտրություններից առաջ են սկսում վերանորոգել: Այս մասին, այսօր՝ մայիսի 1-ին, «Երկիր Ծիրանի» կուսակցության քարոզարշավի ընթացքում, լրագրողների հետ զրույցում նշել է կուսակցության կողմից Երեւանի ավագանու թեկնածու Հայկ Պետրոսյանը:
Նրա խոսքով, լավ ճանապարհը այն ճանապարհն է, որը վերականգնման կարիք չունի. «Այսինքն մենք պետք է այնպես անենք, որ ամեն գարուն վերանորոգումներ չլինեն: Մենք չպետք է ցույց տանք, որ աշխատում ենք: Աշխատանքի լավ արդյունքն այն է, որի արդյունքը չի երեւում, ուղղակի քաղաքացին զգում է, որ ամեն ինչ նորմալ է»:
Անդրադառնալով Երեւան քաղաքի կառուցապատմանը, «Երկիր Ծիրանիի» թեկնածուն ասաց. «Պարզ է, որ եթե արդեն շենքերը կառուցվել են, դրանց չենք կարող ձեռք տալ: Բայց մեր ծրագրում ունենք կետ, որ Կենտրոնի կառուցապատումը այլեւս պետք է արգելել: Փոքր կենտրոնում այլեւս ոչ մի կառուցապատում չպետք է տեղի ունենա: Կենտրոնը գերխիտ է, եւ դա ստեղծում է տարբեր խնդիրներ քաղաքացիների համար: Քաղաքը նախեւառաջ քաղաքացու արժանապատիվ կյանք ապահովելու համար է: Դրա համար կառուցապատումը պետք է տարածենք դեպի արվարձաններ: