ՀՀ կենտրոնական ընտրական հանձնաժողովի նախագահ Տիգրան Մուկուչյանը տեղյակ է ժամը 11։00-ի դրությամբ արձանագրված բոլոր ընտրախախտումների մասին։
«Ամեն ինչին էլ տեղյակ ենք, ամբողջ ինֆորմացիան ճշգրտվում է, ճշտում ենք տեղամասերից նաեւ, կապը մշտապես կա, որովհետեւ ԿԸՀ-ում գործում է իրավիճակային վերլուծությունների կենտրոն, որի հիմնական նպատակն է բոլոր տեղեկությունները ճգրտել, հստակեցնել, համապատասխան պարզաբանումներ ներկայացնել», - լրագրողների հետ զրույցում նշել է ԿԸՀ նախագահը։
«Պետք է նկատել, որ անգամ այս պարագայում կան հանգամանքներ, որոնց մի մասը շատ մեծ վերապահումով կարելի է փորձել խախտում որակել: Կան հանգամանքներ, որոնք ստուգվում են հանձնաժողովի հետ, կան տեղամասեր, որոնց համարները սխալ են նշվում այդ հաղորդագրություններում: Ցանկացած ահազանգ, հրապարակում մանրակրկիտ ուսումնասիրության, վերլուծության առարկա է լինում»,-ասաց նա:
Մուկուչյանի խոսքով, թե տարածքային ընտրական հանձնաժողովները, թե տեղամասային ընտրական հանձնաժողովները, թե ԿԸՀ-ն ուշի-ուշով հետեւում են ու ուսումնասիրման առարկա են դարձնում ընտրախախտումների մասին ցանկացած հաղորդագրություն, որը զետեղվում է լրատվական կայքերում տարբեր դիտորդական կազմակերպությունների կողմից։
