ԿԸՀ մայիսի 17-ին արտահերթ նիստի ժամանակ քննարկում է Երեւանի ավագանու ընտրությունների ժամանակ «Իրավունքի Եվրոպա» ՀԿ դիտորդներից մեկի՝ Միքայել Փամբուխչյանի իրավունքների խախտման մասին դիմումը։
NEWS.am-ի թղթակիցը հայտնում է, որ ընտրությունների օրը, մայիսի 14-ին, ըստ ներկայացված դիմումի, խախտվել են ՀԿ-ի դիտորդ Միքայել Փամբուկչյանի իրավունքները՝ թիվ 2 տարածքային ընտրական հանձնաժողովում նրան հրաժարվել են տրամադրել Երեւանի ավագանու ընտրությունների արդյունքների արձանագրությունները։ «Տեղի է ունեցել դիտորդի իրավունքների կոպիտ խախտում»,- նշել է Միքայել Փամբուկչյանը։
Թիվ 2 տարածքային ընտրական հանձնաժողովի ղեկավար Մարատ Սեւոյանն իր հերթին արձանագրությունները տրամադրելու մերժումը հիմնավորել է նրանով, որ դիտորդին խնդրել են սպասել, մինչեւ բոլոր արձանագրությունները կստացվեն ու կկազմվեն համապատասխան աղյուսակները։
Պատասխանելով ԿԸՀ նախագահ Տիգրան Մուկուչյանի հարցին, թե որն է դիմումի կոնկրետ պահանջը, փաստաբան Արամազդ Կիվիրյանը ,որը իրավական աջակցություն է տրամադրում դիտորդին, ասել է «Այս պահին դիտորդի իրավունքը խախտվել է։ Մենք ուզում ենք, որ դա ամրագրվի, քանի որ կա խախտման փաստ» ։ Նրա խոսքով, իրենք պահանջոււմ են ԿԸՀ համապատասխան որոշումով ֆիքսել խախտման փաստը ու նախատեսել նաեւ վարչական պատասխանատվություն։
Դրան Տիգրան Մուկուչյանը պատասխանել է «Ձեր դիմումում չկա ոչ մի իրավական հիմնավորում։ Ես դիտորդին հարցնում եմ՝ ուզո՞ւմ եք հիմա լուսանկարել այդ արձանագրությունները։ Նա ասում է՝ ոչ»։
