ԵԱՀԿ Մինսկի խմբի համանախագահների համար աստիճանաբար ակնհայտ է դառնում, որ Ադրբեջանը պատրաստ չէ խաղաղության, պատրաստ չէ փոխզիջման ճանապարհով խնդրի կարգավորմանը, եւ որ Բաքուն պատերազմի է պատրաստվում: Այս մասին NEWS.am-ի թղթակցի հետ զրույցում ասել է «Ծառուկյան» դաշինքից ՀՀ Ազգային ժողովի պատգամավոր Նաիրա Զոհրաբյանը:
Նրա խոսքով`համանախագահների վերջին հայտարարությունը մեծ նշանակություն ունի: «Անկեղծ ասած, ես չեմ հիշում մեկ այլ հայտարարություն, որտեղ լինեին այնպիսի հստակ ձեւակերպումներ, ինչպես այս անգամ: Այս տարիների ընթացքում մենք ականատես էինք լինում, թե ինչպես համանախագահները, դիվանագիտական հավասարություն պահպանելու նպատակով, հավասարության նշան դնելու փորձեր եւ երկու կողմերին ուղղված կոչեր են արել: Բայց այս հայտարարությունը շատ կարեւոր է, քանի որ դրանում հստակ արձանագրվում է, որ պայմանավորվածություններն ու հրադադրի ռեժիմը խախտում է Ադրբեջանը», - ընդգծել է Զոհրաբյանը:
Ըստ նրա` սա հստակ հաղորդագրություն է Ադրբեջանին այն մասին, որ հետայսու ԵԱՀԿ Մինսկի խմբի համանախագահերի հայտարարություններն ուղղված կլինեն կոնկրետ հասցեատիրոջը: «Մինչեւ օրս տարբեր պատճառներով` բանակցային գործընթացին չվնասելու համար եւ այլն, նրանք զերծ էին մնում հստակ մեղավորներին նշելուց: Այժմ այս հայտարարությունը հստակ հաղորդագրություն է Ադրբեջանին, որ այսուհետ այդպես չի լինի, այսուհետ հասցեատերը հստակ կնշվի: Եւ մեզ համար` միջազգային կառույցներում աշխատող պատգամավորների, դա կարեւոր փաստաթուղթ է այն տեսանկյունից , որ այդ կառույցները` ԵԽԽՎ-ն, ԵՄ կառույցները, թե այլ հարթակներ, որոնք մշտապես հղում են անում ԵԱՀԿ Մինսկի խմբի հայտարարությունների, արդեն ազատ կլինեն իրենց դիրքորոշումն արտահայտելիս»,-ընդգծել է Զոհրաբյանը:
Հիշեցնենք, որ ԵԱՀԿ Մինսկի խմբի համանախագահները դատապարտել են ղարաբաղյան հակամարտության գոտու շփման գծում հրադադարի ռեժիմի վերջին խախտումները եւ կողմերին կոչ են արել անհրաժեշտ քայլեր ձեռնարկել՝ հակամարտության գոտում իրադրության հետագա սրումը կանխելու համար:
«Բազմաթիվ հավաստի աղբյուրներից հավաքված տեղեկատվության համաձայն՝ Ադրբեջանը մայիսի 15-ին շփման գծում հրթիռ է արձակել՝ ոչնչացնելով ռազմական տեխնիկա։ Մայիսի 16-ի երեկոյան եւ հաջորդ օրը հայկական զինված ուժերը պատասխանել են տարբեր տրամաչափի ականանետային կրակահերթերով։ Երկու կողմերի նման գործողությունները հրադադարի ռեժիմի զգալի խախտում եւ տագնապի առիթ են»,- ասված է եռանախագահների հայտարարությունում:
