ԱՄՆ-ի եւ Եվրամիության կառույցների առաջնորդները Բրյուսելում հանդիպման ժամանակ պայմանավորվել են ակտիվացնել «Իսլամական պետություն» ահաբեկչական խմբավորման դեմ պայքարը։ Այս մասին հաղորդում է «ՌԻԱ Նովոստի»-ն՝ վկայակոչելով ԵՄ-ում իր աղբյուրին։
ԱՄՆ նախագահ Դոնալդ Թրամփը հինգշաբթի Բրյուսելում հանդիպել է Եվրախորհրդի եւ Եվրահանձնաժողովի նախագահներ Դոնալդ Տուսկի եւ Ժան-Կլոդ Յունկերի հետ։ Ավելի ուշ նրանց են միացել ԵՄ դիվանագիության ղեկավար Ֆեդերիկա Մոգերինին եւ Եվրախորհրդարանի նախագահ Անտոնիո Տայանին։
«Հակաահաբեկչության հարցի շուրջ ԻՊ-ի դեմ պայքարն ակտիվացնելու համաձայնություն է ձեռք բերվել»,- հայտարարել է աղբյուրը։
Նրա խոսքով՝ ԱՄՆ-ն նաեւ հավանության է արժանացրել Հյուսիսային Կորեայի դեմ ԵՄ-ի պատժամիջոցների քաղաքականությունը։ «Քննարկվել է՝ ինչպես շարունակել աշխատանքները՝ հիմնվելով արդեն առկա լավ համագործակցության վրա»,- նշել է նա։