Վաշինգտոնի Ռազմավարական հետազոտությունների միջազգային կենտրոնի փորձագետ Բյուլենտ Ալիրզան Ազատություն ռադիոկայանի ադրբեջանական ծառայությանը տված հարցազրույցում նշել է, որ արդեն երկար տարիներ ԱՄՆ-ն ու Ռուսաստանը Ղարաբաղյան հարցի շուրջ երկխոսում են ԵԱՀԿ Մինսկի խմբի շրջանակում:
«Ռուսաստանն արդեն երկար տարիներ օգուտներ է քաղում հակամարտությունից, Հայաստանը կարգավորման համար մշտապես աջակցություն է ակնկալում Մոսկվայից, Ադրբեջանը` նույնպես», - ասել է Ալիրզան:
Նրա խոսքով, Ռուսաստանը նախկինում օգտագործել է Ղարաբաղյան հակամարտությունը տարածաշրջանում իր ազդեցությունն ուժեղացնելու համար: Ռուսաստանը կձգտի կարգավորման, եթե կարողանա օգուտ քաղել դրանից:
«Սակայն անձամբ ես չեմ հավատում, որ Մոսկվան այդպիսի եզրակացության կգա: Բացի այդ այսօրվա իրավիճակում ԱՄՆ-ն Ռուսաստանի վրա ճնշում չի գործադրում եւ առանձնապես մեծ նշանակություն չի տալիս ղարաբաղյան կարգավորմանը: ԱՄՆ-ի օրակարգում այլ ակտուալ հարցեր կան: Օբաման նաեւ ներքին խնդիրներ ունի», - նշել է Ալիրզան:
Աստանայում կայանալիք ԵԱՀԿ գագաթաժողովում Ղարաբաղի հարցով առաջընթաց ակնկալելու մասին փորձագետը նշել է, որ նախկինում էլ եղել են այդպիսի հանդիպումներ, սակայն բեկում երբեք չի եղել:
Ալիրզան նաեւ անդրադարձել է ԱՄՆ-Թուրքիա հարաբերություններին` հիշեցնելով, որ այդ երկրների ռազմավարական դաշինքը եղել է Սառը պատերազմի տարիներին` ԽՍՀՄ-ի դեմ: 20 տարի անց երկու երկրներն արդեն տարաձայնություններ ունեն: 2003-ին Թուրքիան չտրամադրեց իր տարածքը Իրաքի դեմ գործողությունների համար: Այժմ էլ Թուրքիան չնայած ԱՄՆ-ի ճնշմանը շարունակում է առեւտուրը Իրանի հետ եւ սրում է հարաբերությունները Իսրայելի հետ:
Թուրքիան փորձում է հավասարակշիռ քաղաքականություն վարել Արեւմուտքի եւ Արեւելքի միջեւ, ինչը շատ բարդ է: Փորձագետի կարծիքով, Թուրքիայի եւ ԱՄՆ-ի հարաբերություններում կա որոշակի սահման, որը կողմերը չեն անցնի, սակայն նախկինի նման սերտ ու անխնդիր հարաբերություններ դժվար թե լինեն: