Հայտնի քրեական հեղինակություն «Ճաճոյի Էդոյի» որդու սպանության մեջ կասկածվող նրա կնոջ՝ Լիանա Կ.-ի նկատմամբ դատահոգեբուժական-դատահոգեբանական եւ դատաբժշկական համալիր փորձաքննություն է նշանակվել: Այս մասին այսօր՝ մայիսի 26-ին, NEWS.am-ը տեղեկացավ ՀՀ քննչական կոմիտեի նախագահի խորհրդական Սոնա Տռուզյանից:
Փորձաքննությունների արդյունքում կպարզվի՝ ինչ հոգեվիճակում է եղել կինը դեպքի պահին:
Ավելի վաղ տեղեկացրել էր, որ դեպքի առթիվ ՀՀ քննչական կոմիտեի Լոռու մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին՝ «սպանություն» և 235-րդ հոդվածի 1-ին մասերով՝ «ապօրինի զենք պահելը», որի նախաքննությունը հանձնարարվել է քննչական խմբին:
Սպանված 33-ամյա Տիգրան Մարտիրոսյանը քրեական հեղինակություն Ճաճոյի Էդոյի որդին է, որը, ըստ տարբեր աղբյուրների, տարիներ շարունակ ծեծել ու նվաստացրել է կնոջը:
