«Ավրորա» մարդասիրական նախաձեռնության շրջանակում Հայաստան այցելած հյուրերն ու մրցանակի հավակնորդներն այսօր՝ մայիսի 28-ին, այցելել են Ծիծեռնակաբերդի հուշահամալիր եւ հարգանքի տուրք մատուցել Հայոց մեծ եղեռնի նահատակների հիշատակին: Հյուրերին ուղեկցել են «Ավրորա» նախաձեռնության համահիմնադիրներ Ռուբեն Վարդանյանը, Նուբար Աֆեյանը եւ «Ավրորա-2017» մրցանակի ընտրական հանձնաժողովի անդամ Վարդան Գրեգորյանը (ֆոտոռեպորտաժ):
«Ավրորա-2017» մրցանակի հավակնորդներ Սոմալիում Խաղաղության եւ մարդու իրավունքների Էլման կենտրոնի հիմնադիրներ Ֆարթուն Ադանն ու Էլվադ Էլմանը, Նուր պոտենցիալի եւ կրթական համակարգի զարգացման կազմակերպության նախագահ Ջամիլիա Աֆղանին, Սուդանի Mother of Mercy հիվանդանոցի վիրաբույժ Թոմ Կատինան, Սիրիայում դաշտային հոսպիտալի բժիշկ Մուհամմադ Դարվիշը, Կոնգոյի Դեմոկրատական հանրապետությունից վիրաբույժ-գինեկոլոգ, հիվանդանոց հիմնադրած դոկտոր Դենիս Մուկվեգեն, մրցանակաբաշխության ժոյւրիի անդամ, իրանցի իրավապաշտպան, Նոբելյան դափնեկիր Շիրին Էբադին ծաղիկներ են դրել Հայոց ցեղասպանության զոհերի հիշատակին:
Ցեղասպանության թանգարան-ինստիտուտի տնօրեն Հայկ Դեմոյանը հյուրերին ներկայացրել է Ծիծեռնակաբերդի հուշահամալիրի ստեղծման եւ Հայոց ցեղասպանության պատմությունը: