Երեւանի ավագանու «Երկիր Ծիրանի» խմբակցության անդամներ Հայկ Պետրոսյանն ու Մնացական Պարակշիեւն արձագանքել են խմբակցության՝ դավաճանության մասին մեղադրանքներին: 

Տարածած հայտարարության մեջ ասվում է. «Ինչ-ինչ պատճառներով, այն հանգամանքը, որ մենք կողմնակից ենք կուսակցության Երեւանի ծրագիրը իրագործել սառը դատողությամբ եւ ոչ թե էմոցիոնալ երանգներ հաղորդելով գործընթացներին, ինչպես նաեւ բոլոր գործողությունները կատարել օրենքի շրջանակներում եւ անկախ ամեն ինչից պահպանել պրոֆեսիոնալիզմ եւ հարգալից վերաբերմունք, կուսակցության կողմից գնահատվել է, որպես կուսակցության գծից շեղում, պարտականությունների չկատարում եւ թիմային աշխատանքի խաթարում։

Հայաստանի անկախության մոտ երեք տասնամյակների ընթացքում, մենք բազմաթիվ անգամ ականատես ենք եղել, երբ կարեւորագույն հարցերին տրվում էին ուռճացված էմոցիոնալ երանգներ, սակայն հարցը հիմովին լուծում չէր ստանում, ինչը շարունակական հիասթափության ալիք էր բարձրացնում մեր քաղաքացիների մոտ, դրանով իսկ սերմանելով անվստահություն եւ անտարբերություն առողջ քաղաքական պայքարի հանդեպ։ Մեր համոզմամբ, այսպիսի մոտեցումը անուղղակիորեն աջակցում է գործող իշխանությանը եւ խոչնդոտում է առողջ ժողովրդավարության զարգացմանը մեր հայրենիքում։

Ինչպես բազմաթիվ անգամներ նշվել էր քարոզարշավի ընթացքում, Երեւանի ավագանու անդամ լինելով, մեր աշխատանքը պետք է լինի ոչ միայն բարձրաձայնելը երեւանցիների խնդիրների մասին, այլեւ լինել կառուցողական, հանդես գալ առարկայական առաջարկներով եւ անել մեր լիազորություններից բխող ամեն ինչ, որպեսզի այդ խնդիրները լուծվեն»:

Նրանք պատրաստվում են հունիսի 23-ին մամուլի ասուլիսով հանդես գալ:

Հիշեցնենք, որ «Երկիր ծիրանի» կուսակցությունը հունիսի 18-ին հրավիրած նիստում որոշում էր ընդունել կուսակցության Երեւանի ավագանու խմբակցության երկու անդամի նկատմամբ անվստահություն հայտնել եւ նրանց առաջարկել դադարեցնել ավագանու անդամի լիազորությունները։