Եվրաինտեգրման գործընթացները Հայաստանում կրում են բացառապես ձեւական բնույթ: Այս մասին նոյեմբերի 27-ին լրագրողների հետ հանդիպմանը հայտարարել է ԱԺ ՀՅԴ խմբակցության ղեկավար Վահան Հովհաննիսյանը:
Նրա խոսքով , գիտաժողովները, հանդիպումները, դեկլարատիվ հայտարարություններն ամենեւին էլ եվրաինտեգրացիա չեն: Ներկայումս Հայաստանի հասարակության շրջանում եվրաինտեգրման գործընթացներ չեն նկատվում:
«Միեւնույն ժամանակ Հայաստանի այսպես կոչված էլիտան արդեն ամբողջությամբ ավարտել է իր սեփական եվրաինտեգրման գործընթացը: Նրանք հաշվեհամարներ ունեն եվրոպական բանկերում, տներ Եվրոպայում, եւ նրանց երեխաները կրթություն են ստանում բացառապես Եվրոպական համալսարաններում»,- ասաց Հովհաննիսյանը:
Դաշնակցական գործիչը նշեց, որ եթե պետության իշխանություններն իրոք ձգտում են գնալ եվրաինտեգրման ճանապարհով, ապա պետք է փոխեն իրենց վերաբերմունքը հասարակության նկատմամբ, իր դիրքորոշումները տնտեսական եւ արտաքին քաղաքակության հարցերում: