Այսօր՝ նոյեմբերի 29-ին կառավարության նիստերի դահլիճում մեկնարկել է Հայաստանի կոմունիստական կուսակցության 38-րդ համագումարը, որն անցկացվում է Հայաստանում կոմունիստական կարգերի հաստատման 90-ամյակի կապակցությամբ:
ՀԿԿ Կենտկոմի առաջին քարտուղար Ռուբեն Թովմասյանը հայտարարել է , որ ՀԿԿ-ն այսօրվանից պատրաստվում է խորհրդարանական ընտրություններին: «Որովհետեւ վաղը արդեն ուշ կլինի»,- ասաց նա՝ միաժամանակ հավելելով, որ ՀԿԿ-ին շատ է մտահոգում այն հանգամանքը, որ գործող խորհրարանում չունի մանդատներ եւ չի կարող բարձրաձայնել ժողովորդին հուզող խնդիրների մասին:
Թովմասյանը նշեց, որ ներկա ռեժիմը, շարունակելով իր նախորդների արատավոր քաղաքականությունը, ժողովրդին զրկել է ազատ եւ թափանցիկ ընտրություններ անցկացնելու հնարավորությունից, ինչի ապացույցն են մինչ օրս տեղի տեղի ունեցած նախագահական, խորհրդարանական եւ տեղական ինքնակառավարման մարմինների ընտրությունները: Դրանք, ըստ Թովմասյանի, զուրկ են եղել գաղափարական պայքարից, եւ շեշտը դրվել է ֆինանսների, կեղծիքների, եւ այլ արատավոր երեւույթների վրա:
Ռուբեն Թովմասյանն անդրադարձավ նաեւ Հայաստանում տեղի ունեցած իրադարձություններին՝ նշելով, որ Հայաստանում բոլոր կարեւոր գործերի կազմակերպիչն ու ներշնչողը եղել է հայկոմկուսը:
Ի դեպ, Համագումարը «բոցաշունչ» շնորհավորանքներ է հղել Մոլդովայի կոմունիստներին՝ խորհրդարանական ընտրություններում տարած «հաղթանակի» կապակցությամբ:
Ինչպես հայտնում է NEWS.am-ի թղթակիցը, դահլիճը լի է կոմունիստներով, որոնք հիմնականում տարեց են, եւ դժգոհում են, որ վերջին շարքերում չի լսվում «ընկեր Թովմասյանի» ձայնը եւ պարբերաբար խնդրում են բարձր խոսել:
