Բավական բարդ է սպասել, որ արցախյան «ճակատներում» որեւէ նոր բան տեղի կունենա։ Այս մասին հունիսի 26-ին լրագրողների հետ հանդիպմանն ասաց Կովկասի ինստիտուտի տնօրեն, քաղաքագետ Ալեքսանդր Իսկանդարյանը։
«Ես նկատի ունեմ ե՛ւ շփման գիծը, ե՛ւ բանակցային գործընթացը»,- հստակեցրեց քաղաքագետը՝ հավելելով, որ Ադրբեջանը լարվածությունը սատարող ռազմավարություն է վարում, իսկ ժամանակ առ ժամանակ հակամարտության լարվածություն կհրահրի։
Իսկանդարյանը նշեց, որ ո՛չ ԵԱՀԿ Մինսկի խմբի ներկայացուցիչները, ո՛չ համաշխարհային հանրությունն ընդհանուր առմամբ Ադրբեջանի վրա ազդելու քաղաքական լծակներ չունեն։ Քաղաքագետը դա բացատրում է տնտեսական միջոցներով Ադրբեջանի վրա լուրջ ազդեցություն գործելու հնարավորության բացակայությամբ։
Նրա խոսքով՝ ադրբեջանական կողմի ռազմավարությունն ուղղված է պարզապես մարդկանց ոչնչացնելուն, ինչին հայկական կողմն իր հերթին բավական կոշտ է արձագանքում։ «Վերջին սրումը, հավանաբար, երկու բանի հետ է կապված։ Նախ՝ Յոհաննես Հանի Բաքու այցի հետ։ Երկրորդ՝ նրանք տոնում էին բանակի օրը եւ պետք էր ինչ-որ բան ցույց տալ։ Շատ բարդ է դա վերահսկել կամ կանգնեցնել։ Ուրախ կլինեի սխալվել, բայց վախենում եմ, որ ժամանակ առ ժամանանկ նման լարվածություն կարձանագրվի»,- ընդգծեց Իսկանդարյանը։