Հռոմի պապ Ֆրանցիսկոսը «Laudato Si’ եւ խոշոր քաղաքներ» համաժողովի անդամներին դիմել է հատուկ ուղերձով՝ կրկին կոչ անելով խնամքով վերաբերվել շրջակա միջավայրին։ «ՏԱՍՍ»-ի փոխանցմամբ՝ համաժողովը տեղի է ունենում Ռիո դե Ժանեյրոյում։

«Արարչագործության մասին հոգ տանելը մեր հիմնական խնդիրներից մեկն է», -Վատիկանի ռադիոն մեջբերում է քահանայապետի ուղերձը։

«Չի կարելի անտարբեր մնալ, երբ օդի որակը նվազում է կամ երբ ավելանում է թափոնների քանակը, որոնց վերամշակումը նորմերին չի համապատասխանում»։ Պապն ընդգծել է, որ այդ իրավիճակը «արարչագործության նկատմամբ անպատասխանատու վերաբերմունքի հետեւանք է եւ մեզ կոչ է անում պատասխանատվություն ստանձնել հանուն համընդհանուր բարօրության»։ «Դժբախտաբար, մենք անտարբերություն ենք նկատում մեր ընդհանուր տան նկատմամբ, ինչը խոսում է պատասխանատվության զգացման կորստի մասին։ Ուստի անհրաժեշտ է, որ յուրաքանչյուր կառավարություն հոգ տանի շրջակա միջավայրի մասին»,-ասվում է ուղերձում։ 

Ֆրանցիսկոս պապը իր ուղերձում երեք կետ է առանձնացնում՝ «հարգանք, պատասխանատվություն եւ մարդկային վերաբերմունք»՝ նշելով, որ  «շրջակա միջավայրի նկատմամբ հարգանքը պարտք է ապագա սերունդների առջեւ»։

Հռոմի պապը նաեւ ուշադրություն է հրավիրում մարդկային հարաբերությունների կարեւորության վրա, որոնք խոշոր քաղաքներում ավելի շատ են դժվարությունների հետ բախվում։