«Սասնա ծռեր» խմբի անդամների նկատմամբ ապօրինի եւ անհամաչափ ուժ է կիրառվել: Այս մասին հուլիսի 18-ին հայտարարեց փաստաբան Հայկ Ալումյանը՝ ելույթ ունենալով «Համակարգային անպատժելիությունը որպես քրեական արդարադատության մարտահրավեր» թեմայով հասարակական քննարկման ընթացքում, որը կազմակերպել է «Բաց հասարակության հիմնադրամներ-Հայաստան» կազմակերպությունը:
Նրա խոսքով՝ ամբաստանյալներին դատարանի դահլիճից դուրս են բերել վիրավորական կերպով, քարշ են տվել նկուղ եւ դաժանաբար ծեծել: «Այդ ընթացքում նրանք ձեռնաշղթաներով են եղել: Դուք պատկերացնո՞ւմ եք՝ պաշտպանյալին ծեծում են փաստաբանի աչքերի առջեւ: Սա նշանակում է, որ փաստաբանին վիրավորում են մասնագիտական առումով եւ արհամարհում նրա փաստաբանական գործունեությունը»,- ընդգծեց Ալումյանը:
Հիշեցնենք, որ հունիսի 28-ին դատական նիստի ժամանակ ոստիկաններից մեկը ամբաստանյալներից Արեգ Կյուրեղյանին թույլ չի տվել փաստաբանին գրություն փոխանցել: Դրան հետեւել է ամբաստանյալի եւ ոստիկանի միջեւ սկսված վեճը, ոստիկանները դատարանի դահլիճից դուրս են բերել Արեգ Կյուրեղյանին, Մխիթար Ավետիսյանին եւ Սմբատ Բարսեղյանին: Ավելի ուշ Կյուրեղյանի եւ Ավետիսյանի, նաեւ 2 այլ ամբաստանյալների՝ Արայիկ Խանդոյանի եւ Գագիկ Եղիազարյանի փաստաբանները հայտարարել են, որ ոստիկանները դատարանի նկուղում ծեծել են իրենց պաշտպանյալներին: Human Rights Watch միջազգային իրավապաշտպան կազմակերպությունը նշել է, որ հունիսի 29-ին ՀՀ օմբուդսմենի ներկայացուցիչներն այցելել են Մխիթար Ավետիսյանին, Արայիկ Խանդոյանին եւ Գագիկ Եղիազարյանին ու գրանցել են, որ նրանց մարմիններին վնասվածքներ են եղել, որոնք համապատասխանում են ծեծելու մասին նրանց պնդումներին: