2017թ-ի առաջին եռամսյակի ընթացքում Հայաստան ներգնա զբոսաշրջային այցելությունների թիվը աճել է: Այս մասին NEWS.am-ի հետ զրույցում ասաց ՀՀ զբոսաշրջության պետական կոմիտեի նախագահի առաջին տեղակալ Մեխակ Ապրեսյանը: Նա նշեց, որ առաջին եռամսյակի ընթացքում Հայաստան է եկել 299 հազար զբոսաշրջիկ, ինչը 18․2 %-ով ավելի է նախորդ տարվա նույն ժամանակահատվածի համեմատ, իսկ 2017թ-ի հունվար-մայիս ամիսների ընթացքում ընդհանուր այցելությունները Հայաստան նախորդ տարվա նույն ժամանակահատվածի համեմատ՝ աճել է ավելի քան 30%-ով:
«Հիմնականում Ռուսաստանից, Չինաստանից, Իրանից, արաբական երկրներից, եվրոպայից են գալիս: Զգալի աշխատանքներ են տարվում համաշխարհային շուկայում Հայաստանի հասանելիության բարձրացման առումով, վիզային ռեժիմի դյուրացման, որոշ երկրների հետ էլ ուղիղ չվերթներ ենք կազմակերպել, ինչն էլ նպաստում է ներգնա զբոսաշրջային այցելությունների թվի աճին»,-ասաց նա:
Նրա խոսքով, եթե զբոսաշրջիկներն առաջ Երեւան էին գալիս եւ այլ զբոսաշրջային վայրեր, ապա այժմ այցելում են նաեւ Գյումրի. «Քանի որ Գյումրիում արդեն չվերթներ ունենք, զբոսաշրջիկները Գյումրի եւս գնում են արդեն, շատ կարեւոր է նաեւ, որ նրանք Հայաստանից շատ գոհ են հեռանում»:
