Վրաստանի դատախազությունում կարծում են, որ վերջերս պաշտոնաթող եղած պատրիարքի թիկնազորի պետ Սոսո Օհանաշվիլին կարող է մասնակից լինել «ցիանիդի գործին»՝ պատրիարքարանում ազդեցիկ անձին՝ Շորենա Տետրուաշվիլիին թունավորելու հետ կապված, հաղորդում է «Նովոստի Գրուզիա»-ն։

Դատախազ Ջարջի Ցիկլաուրին հայտնել է, որ Սոսո Օհանաշվիլին եւ պատրիարքի անվտանգության ծառայության շարքային աշխատակից Տարաս Շավշիշվիլին երեց Գերոգի Մամալաձեի հետ միասին քննարկել են Շորենա Տետրուաշվիլիին պաշտոնանկ անելու հարցը։

Օհանաշվիլին «ցիանիդի գործով» մեղադրող կողմի գլխավոր վկաներից է։ Հենց նա էր փետրվարին պատասխանատու պատրիարքի անվտանգության համար, երբ Մամալաձեին ձերբակալեցին Թբիլիսիի օդանավակայանում եւ նրա ուղեբեռում թունավոր նյութ՝ նատրիումի ցիանիդ հայտնաբերեցին։

Պատրիարքի թիկնազորի ծառայության նախկին պետին հարցաքննել են սկայպով, քանի որ նա Վրաստանի սահմաններից դուրս է։ Օհանաշվիլին պաշտոնաթող է եղել փետրվարի վերջին՝ Մամալաձեի կալանավորվելուց հետո։ Մայիսին նա Գերմանիա է մեկնել։