Վրաստանի նախկին նախագահ եւ Օդեսայի նախկին նահանգապետ Միխայիլ Սահակաշվիլին հայտարարել է, որ հետամուտ կլինի Ուկրաինա վերադառնալու իր օրինական իրավունքին։ Այս մասին Սահակաշվիլին գրել է Facebook-ում, երբ հայտնի է դարձել, որ նրան զրկել են Ուկրաինայի քաղաքացիությունից։
«Ես միայն մեկ քաղաքացիություն ունեմ՝ Ուկրաինայի, եւ նրանց չի հաջողվի զրկել ինձ դրանից։ Այժմ ինձ ցանկանում են ստիպել փախստականի կարգավիճակ ստանալ։ Նման բան չի լինի։ Ես չեմ պատրաստվում որեւէ տեղ մնալ եւ որեւէ կարգավիճակ ստանալ։ Ես հետամուտ կլինեմ Ուկրաինա վերադառնալու իմ օրինական իրավունքին։
Պորոշենկոն (Ուկրաինայի նախագահը) որոշեց ինձ զրկել քաղաքացիությունից գաղտնի, քանի դեռ ես երկրում չեմ»,- նշել է Սահակաշվիլին։
Նրա խոսքով՝ այդ հրամանով Պորոշենկոն ստորագրել է «իր եւ իր իշխանության անխուսափելի պարտությունը։ Եվ եթե նախկինում դուք կարող էիք հուսալ, որ «կձգեք» մինչեւ ընտրություններ, այժմ դրանք միայն երազում կարող եք տեսնել»։