Տնտեսապես ուժեղ երկրներում ֆինանսական քաղաքականության խստացումը, համաշխարհային գործազրկության բարձր մակարդակը եւ միջազգային արժույթների պատերազմը լրիվ իրատեսական են դարձնում համաշխարհային ֆինանսական ճգնաժամի երկրորդ ալիքի մասին կանխատեսումները: Այս մասին ասված է ՄԱԿ-ի «Համաշխարհային տնտեսական իրավիճակը եւ հեռանկարները 2011-ին» անվանումը կրող զեկույցում: Փաստաթղթի հեղինակները վստահ են, որ 2011-ին տնտեսական աճի տեմպերը կտրուկ կնվազեն, իսկ համաշխարհային ՀՆԱ-ի աճը կկազմի ընդամենը 3,1 տոկոս:
Առավել մռայլ կանխատեսում է արվում Չինաստանի մասով, որտեղ ըստ այդ զեկույցի, ՀՆԱ աճը 2011-ին կկազմի 8,9 տոկոս, ներկա 10,1-ի փոխարեն: ՄԱԿ-ում կարծում են, որտնտեսական աճի տեմպերի նվազում պետք է սպասել ինչպես զարգացած, այնպես էլ առաջատար զարգացող երկրների տնտեսությունում: