Հուրգադայի հյուրանոցներից մեկի լողափին հուլիսի 14–ին հարձակման ենթարկվելու հետեւանքով վիրավորված ՀՀ քաղաքացու վիճակը գնահատվում է միջինից լավ:

Եգիպտոսում ՀՀ դեսպանատան թվիթերյան էջից տեղեկանում ենք, որ ըստ Հուրգադա մեկնած պրոֆեսոր Արտակ Հովհաննիսյանի՝ դրական դինամիկայի պահպանման պարագայում հայ զբոսաշրջիկը մոտ ժամանակներս կվերադառնա Հայաստան:

Նշենք, որ Արտակ Հովհաննիսյանը ՀՀ ԱԳՆ-ի նախաձեռնությամբ Հուրգադա էր  գործուղվել օրեր առաջ:

Ավելի վաղ տեղեկացրել էինք, որ Կահիրեի «Նասեր» հիվանդանոց տեղափոխված  ՀՀ երկու քաղաքացիներից մեկը դուրս է գրվել, մյուսը շարունակում է բուժումը:

Հիշեցնենք, որ հուլիսի 14-ին 28-ամյա Աբդել Ռահման Շաաբանը Հուրգադայի հյուրանոցներից մեկի ծովափին դանակով հարձակվել է զբոսաշրջիկների վրա, որի հետեւանքով սպանվել են գերմանացի երկու զբոսաշրջիկներ, եւս չորսը՝ Հայաստանի, Չեխիայի եւ Ռուսաստանի քաղաքացիներ, վիրավորվել են։