«Նաիրիտ» գործարանում տեխնիկական աուդիտ չի անցկացվի: NEWS.am-ի հետ զրույցում այսօր՝ օգոստոսի 12-ին, գործարանի նախկին աշխատակիցներից Կարինե Շահվերդյանն ասաց, որ կառավարությունը թույլ չի տվել «Եվրամիություն-Ասիա բիզնես ֆինանսական կենտրոն» հոլդինգին աուդիտ անցկացնել:
«Մենք հույս ունեինք, որ վերջապես սայլը տեղից շարժվում է, ներդրողներ են եկել, թույլ կտան աուդիտ անցկացնել, սակայն սխալվեցինք: Եվրամիություն-Ասիա բիզնես ֆինանսական կենտրոն» հոլդինգի նախագահ Գրիգորյանը տեսնում է, որ մենք ամեն ինչ անում ենք գործարանը վերագործարկելու համար, պայքարում ենք եւ, ի վերջո, դրա հնարավորությունը կա, բայց թույլ չեն տալիս քայլեր ձեռնարկել»,- ասաց նա:
Կարինե Շահվերդյանը նշեց, որ նաիրիտցիները շարունակելու են իրենց պայքարը՝ դիմելով կտրուկ քայլերի:
Ավելի վաղ հայտնել էինք, որ եվրոպացի ներդրողներ են եկել, այցելել են գործարան եւ ծանոթացել ներկա իրավիճակին, հետո հանդիպում են ունեցել Կառավարության անդամների հետ ու որոշվել է աուդիտ անցկացնել՝ հասկանալու համար, թե որքան ներդրում է հարկավոր գործարանի վերագործարկման համար:
Նշենք, որ «Նաիրիտ» գործարանը սնանկ է ճանաչվել, նախկին աշխատակիցները պահանջում են վերագործարկել այն:
