Մինսկի խմբի համանախագահող երկրների առաքելություններից առաջնայինն այն էր, որ նպաստեին կողմերի դիրքորոշումները մերձեցնելուն, որպեսզի լինի համապարփակ կարգավորում: Այս մասին «Ազատություն» ռադիոկայանի «Կիրակնօրյա վերլուծական Թամրազյանի հետ» հաղորդման եթերում նշել է արտաքին գործերի փոխնախարար Շավարշ Քոչարյանը եւ հավելել, որ այդ ուղղությամբ որեւէ առաջընթաց չկա եւ չի էլ ակնկալվել ադրբեջանական քաղաքականության պատճառով, հետեւաբար, արդեն առաջին պլան է մղվել եռանախագահության երկրորդ առաքելությունը՝ թույլ չտալ, որ իրավիճակն ապակայունանա, թույլ չտալ, որ վերսկսվեն ռազմական գործողությունները:
«Ի դեպ՝ ընդամենը նախօրեին էր, որ ամերիկացի համանախագահ Հոգլանդը համապատասխան հայտարարություն արեց հենց այն մասին, որ այսօր առաջնային խնդիրը դա է՝ ընդհուպ թվարկելով, որ պետք է հետ քաշել դիպուկահարներին, պետք է այդ մոնիթորինգի մեխանիզմներն ուժեղացնել, ավելին՝ տեղադրել սարքավորումներ, սա է իրականում մոտեցումը: Այստեղ շատ կարեւոր է, որը հատուկ շեշտում է Հոգլանդը, որ չնայած կան խորը հակասություններ Ռուսաստանի եւ ԱՄՆ-ի միջեւ, այս հարցում իրենք միասնական են»,-ընդգծել է Շավարշ Քոչարյանը:
Նրա խոսքով, ցանկացած պետություն, ակնհայտ է, որ առաջնորդվում է սեփական շահերով, ցանկացած հարցում, այլ բան է, որ պետությունները ձգտում են տեղավորվել միջազգային խաղի կանոնների մեջ. «Միջազգային հարաբերություններում անշահախնդիր հասկացությունը ռոմանտիզմ է: Կան պետություններ, որոնք ավելի շատ են դա իրականացնում: Նույնիսկ դեպքեր կան, որ իրենց շահը մտցնում են հակասության մեջ միջազգային խաղի կանոնների հետ»,-ասել է փոխնախարարը:
Նա ընդգծել է, որ տվյալ պարագայում ինքը Ռուսաստանի, այսպես ասած, փաստաբանը չէ, ինքը ոչ թե պաշտպանում է Ռուսաստանին, այլ արձանագրում է, որ բոլոր պետություններն ունեն իրենց շահերը:
«Ակնհայտ է, որ Ռուսաստանն անմիջական հարեւանության մեջ է մեր տարածաշրջանի հետ, ինքն իր շահերն ավելի խորն է գիտակցում, քանի որ նաեւ ունի իր պատկերացումներ ԽՍՀՄ փլուզումից հետո հարեւան տարածաշրջանների վրա իր ազդեցության վերաբերյալ»,-ասել է Շավարշ Քոչարյանը՝ հավելելով, որ կարեւորն այն է, որ այստեղ կա համաձայնեցված գործողություն անվտանգության խորհրդի երեք մշտական անդամների կողմից. «Համանախագահները հենց այս հարցում չունեն առնվազն արտահայտված հակասություններ»: