ԱՀ արդարադատության նախարարության աշխատակազմի իրավաբանական անձանց պետական ռեգիստրի գործակալության տվյալներով Արցախում 2017 թվականի առաջին կիսամյակում նախորդ տարվա նույն ժամանակահատվածի համեմատ արձանագրվել է իրավաբանական անձանց պետական գրանցումների 35 եւ անհատ ձեռնարկատերերի հաշվառումների 73 տոկոս աճ:
Արցախի Հանրապետության արդարադատության նախարարությունից NEWS.am-ին հայտնում են, որ մասնավորապես, 2017 թվականի առաջին կիսամյակում գրանցվել են 76 առեւտրային եւ 12 ոչ առեւտրային տիպի իրավաբանական անձինք եւ պետական հաշվառման ենթարկվել 536 անհատ ձեռնարկատերեր:
Հիմնականում ավելացել է առեւտրային տիպի իրավաբանական անձանց եւ անհատ ձեռնարկատերերի գրանցումների եւ հաշվառումների թիվը: Արձանագրված աճին նպաստել են իրավաբանական անձանց պետական գրանցման ոլորտում իրականացվող բարեփոխումները՝ մեկ պատուհանի սկզբունքով Էլեկտրոնային հայտերի ներկայացման համակարգի եւ հայտերի գրանցման հեշտացված ընթացակարգի ներդրումը, ինչպես նաեւ Արցախում գործարար միջավայրի բարելավմանն ուղղված միջոցառումները: