Այս պահին որեւէ բանակցություն չի վարվում, եթե լինի առաջարկ, որը գնային համեմատական առումով ձեռնտու լինի մեզ, մեծ սիրով: Այս մասին Ծաղկաձորում լրագրողների հետ զրույցում ասաց վարչապետ Կարեն Կարապետյանը՝ անդրադառնալով վերջին օրերի քննարկումներին, որոնք կապված են Իրանից գազի ձեռքբերման ծավալների աճին եւ դրա դիմաց փողով վճարելու հարցի հետ:
Անդրադառնալով Մեղրիում հայ-իրանական ազատ տնտեսական գոտու ստեղծման ուղղությամբ տարվող աշխատանքներին վարչապետն ասաց. «Ես կարծում եմ, որ նոյեմբերի վերջ մենք կունենանք որոշակի հարթակ, որովհետեւ այդ հարցում մենք բազմաթիվ փորձեր ենք արել, այդ թվում՝ եղել են եւ՛ հաջողակ բանակցություններ, եւ՛ անհաջող բանակցություններ, բայց միանշանակ այդ հարթակը ստեղծելու ենք, ձեւավորելու ենք, եւ մոտ ժամանակներս Իրան կայանալիք այցի ժամանակ հստակ խոսելու ենք»։
Հիշեցնենք, որ ավելի վաղ Իրանի ազգային գազային ընկերության միջազգային հարցերով բաժնի տնօրեն Բեհզադ Բաբազադեն theiranproject.com կայքին տված հարցազրույցում հայտարարել էր, որ իրենք դիտարկում են իրանական գազի մատակարարումները ՀՀ ավելացնելու մասին Հայաստանի հարցումը։ Նա նաեւ նշել է, որ Իրանն ուզում է Հայաստանի հետ առանձին համաձայնագիր ստորագրել՝ գազի արտահանումը ավելացնելու մասին, որպեսզի գազի դիմաց վճարը գումարով ստանա։
