ԿՀՎ-ի նախկին աշխատակցուհի Վալերի Փլամ Ուիլսոնը դրամահավաք է սկսել Twitter-ի միկրոբլոգի ծառայությունը գնելու համար, որ արգելափակի ԱՄՆ նախագահ Դոնալդ Թրամփի էջը: Նրա դրամահավաքային արշավը մեկնարկել է GoFundMe ծառայությունում, հայտնում է Газета.ru-ն:
«Դոնալդ Թրամփը Twitter-ում սարսափելի շատ բան է արել: Սպիտակամորթ ռասիստներին խրախուսելուց մինչեւ լրագրողների հանդեպ բռնության առաջմղումը, նրա թվիթները վնաս են հասցնում երկրին եւ մարդկանց»,- նշել է Փլամ Ուիլսոնը:
Նա մտադիր է 1 մլրդ դոլար հավաքել: Ուիլսոնն ընդգծում է, որ եթե չհաջողվի անհրաժեշտ գումարը հավաքել, ապա ինքը մտադիր է ձեռք բերել ընկերության արժեթղթերի տպավորիչ փաթեթ:
«Իրական վտանգ կա, որ այդ թվիթները միջուկային պատերազմի մեկնարկը կտան: Եկեք նրա հաշիվը հեռացնենք, մինչեւ դա տեղի ունենալը»,- հավելել է ԿՀՎ-ի նախկին աշխատակցուհին:
Օգոստոսի 23-ի դրությամբ Ուիլսոնին հաջողվել է 6 օրում մոտ 6 հազար դոլար հավաքել: