Գերմանիայում ապրող արմատական սալաֆիների քանակը նորից ավելացել է: Վերջին տեղեկությունների համաձայն՝ նրանց թիվը 10 300 է, սեպտեմբերի 15-ին հայտնել է dpa գործակալությունը՝ հղում անելով Սահմանադրության պաշտպանության դաշնային մարմնին:
Դրա հետ մեկտեղ վերջին տարիներին որոշ չափով նվազել են արմատական իսլամիստների թվի աճի տեմպերը. 2011 թվականին հատուկ ծառայությունները գրանցել են 3800 սալաֆիների, 2015- ի վերջին՝ 8300, իսկ 2017-ի հունիսին ավելի քան 10 հազար մարդու, հաղորդում է DW-ն:
Ըստ իրավապահ մարմինների տվյալների՝ արմատական իսլամիստների ընդհանուր թիվը Գերմանիայի կազմում է 24 հազար։ Նրանցից շատերը համարվում են պոտենցիալ վտանգավոր: 1800 մարդ համարվում է «իսլամական-ահաբեկչական» սպեկտորի կողմնակից, որոնցից 700-ին ոստիկանությունը համարում է պոտենցիալ ահաբեկիչ: Վերջինների թվում են «Իսլամական Պետություն» խմբավորման համար կռված և Գերմանիա վերադարձած ջիհադականները։
Սահմանադրության պաշտպանության դաշնային մարմնի գնահատմամբ՝ վերջին մի քանի տարիներին շուրջ 940 գերմանացի իսլամիստներ մեկնել են Սիրիա և Իրաք ԻՊ-ին միանալու համար: Նրանց շուրջ մեկ երրորդ մասը վերադարձել է, իսկ 145 մարդ զոհվել ռազմական գործողությունների ընթացքում:
