Իրանի տրամադրության ներքո ապացույցներ կան «Իսլամական պետության» ահաբեկիչներին ԱՄՆ աջակցության վերաբերյալ: Այս մասին հայտարարել է Իսլամական հեղափոխության պահապանների կորպուսի ռազմատիեզերական ուժերի հրամանատար Ամիր Ալի Հաջիզադեն՝ վկայակոչելով վերջին մի քանի տարիներին ամերիկյան հրամանատարական կետեր ներթափանցելու արդյունքում ստացած տվյալները:
«Մենք մի քանի տարի շարունակ ներթափանցել ենք ԱՄՆ հրամանատարական կենտրոններ եւ տեսել ենք, թե նրանք ինչին են հետեւում, որտեղ են հարվածում, ինչի կողքից են անտարբեր անցնում եւ ինչպես են աջակցում ԻՊ-ին»,- ասել է նա IRIB հեռուստաընկերությանը:
Հաջիզադեն նշել է, որ եթե Իսլամական հեղափոխության պահապանների կորպուսը ԻՊ-ին ամերիկյան աջակցության ապացույցները հրապարակելու թույլտվություն ստանա, ԱՄՆ-ի համար Սիրիայում եւ Իրաքում իրենց գործողությունները մեծ սկանդալի կվերափոխվեն:
