Շվեդական Volvo ավտոարտադրողն իր նոր ХС40 պրեմիում դասի կոմպակտ քրոսվերի համար շնորհանդես կանցկացնի Միլանում կայանալիք 80 hours Milan c/o Volvo Cars սկանդինավյան ոճով նոր էքսկլյուզիվ բուտիկի բացման ժամանակ, հաղորդում է Lenta-ն:

Խանութում կներկայացվի Սկանդինավիայի ժամանակակից դիզայնով 40 առաջատար բրենդերի, այդ թվում՝ Teenage Engineering–ի, POC–ի, Front–ի, Monica Förster–ի, John Sterner–ի և այլոց արտադրանքը: Խանութի հաճախորդները կկարողանան ծանոթանալ սկանդինավյան ֆիրմաների հագուստի, աքսեսուարների, գաջետների և տեխնոլոգիական նորարարությունների հետ: Volvo ապրանքանիշը հանդես կգա որպես ցուցահանդեսի համակարգող, որի բոլոր ցուցանմուշները, ներառյալ ավտոմեքենան, հնարավոր կլինի ձեռք բերել տեղում:

80 Hours Milan c/o Volvo Cars-ի պաշտոնական բացումը տեղի կունենա սեպտեմբերի 21-ին, իսկ հաջորդ երեք օրերի ընթացքում՝ Միլանի նորաձևության շաբաթվա ժամանակ, ցանկացողները կկարողանան այցելել ցուցասրահը։

Volvo Cars ընկերությունը 2014 թվականին հայտարարել էր, որ նվազագույնի կհասցնի մասնակցությունը ավտոսրահներին և կփնտրի նոր մոդելները ներկայացնելու նոր ուղիներ: Ներկայումս ֆիրման իր ավտոմեքենաները  Եվրոպայում ցուցադրում է միայն Ժնևի միջազգային ավտոսրահում։