Հանրապետական կուսակցության մամուլի քարտուղար Էդուարդ Շարմազանովը հերքել է լրատվամիջոցներում տարածվող լուրերը, թե նախօրեին կայացել է ՀՀԿ գործադիր մարմնի նիստ, որում քննարկվել է Երեւանի նախկին քաղաքապետին իրենց շարքերից հեռացնելու հարցը:
Ինչպես հայտնել է Շարմազանովը NEWS.am-ի թղթակցի հետ զրույցում, նախօրեին կայացել է ոչ թե գործադիր մարմնի նիստ, այլ ՀՀԿ ղեկավար Սերժ Սարգսյանի հանդիպումը գործադիր մարմնի հետ:
Ըստ Շարմազանովի, հանդիպումը նախապես ծրագրված է եղել եւ նվիրված էր կուսակցության հոբելյանական միջոցառումների կազմակերպմանը: «Ի թիվս այլ հարցերի, քննարկվել է նաեւ Երեւանի քաղաքապետ Գագիկ Բեգլարյանի եւ նախագահի արարողակարգի ծառայության աշխատակից Արամ Կանդայանի միջեւ եղած միջադեպը: Նախագահը հայտարարել է, թե անթույլատրելի է համարում Բեգլարյանի պահվածքը»,- ասել Շարմազանովը եւ հավելել, որ Բեգլարյանին ՀՀԿ-ից հեռացնելու հարցը կարող է քննարկվել կամ խորհրդի, կամ գործադիր մարմնի նիստում:
