Իրաքյան Քուրդիստանում հանրաքվեն կարող է «երկրաշարժ» առաջացնել՝ ինչպես եղել է 1915 թվականին, երբ հայերը Ցեղասպանության ենթարկվեցին: Սեպտեմբերի 22-ին Երեւանում լրագրողների հետ հանդիպման ժամանակ ասաց Թուրքիայի խորհրդարանի՝ քրդական Ժողովուրդների դեմոկրատական կուսակցությունից ընտրված պատգամավոր Կարո Փայլանը:
Նրա խոսքով՝ այժմ նույն բանը տեղի է ունենում քրդերի հետ: «Այդ «երկրաշարժը» կարող է անչափ արյունոտ լինել: Եվ սադրանքների պայմաններում Հայաստանը եւս չի կարող հանգիստ լինել Լեռնային Ղարաբաղի հարցի առումով»,- նշեց Փայլանը:
Թուրքահայ պատգամավորն այնուհետեւ շարունակեց, որ քրդերը պահանջներ ունեն, եւ 100 տարի անց այդ պահանջներն անպատասխան են մնում: «100 տարի առաջ հայերը նույնպես պահանջներ ունեին, իսկ պատասխանը, ցավոք, Ցեղասպանությունը եղավ: Հիմա քրդերի պահանջները նման են 100, 110 տարի առաջվա մեր պահանջներին: Քրդերը ցանկանում են, որ Թուրքիան ժողովրդավարական լինի: Սակայն, ցավոք սրտի, Թուրքիայի իշխանությունները ազգայնական քաղաքականություն են վարում: Այս պատճառով թուրք զինվորականները հիմա Սիրիայի եւ Իրաքի սահմաններին են գտնվում: Այս շաբաթ Թուրքիայի խորհրդարանը նիստ կհրավիրի եւ կառավարությանը իրավունք կվերապահի, որպեսզի թուրք զինծառայողները կարողանան Իրաքում եւ Սիրիայում գործողություն իրականացնել»,- ասաց Կարո Փայլանը՝ հավելելով, որ Թուրքիան այլ ճանապարհ չգտավ, քան ջարդերը:
Հիշեցնենք, որ Իրաքյան Քուրդիստանի ինքնավար իշխանությունները Իրաքից անկախանալու հանրաքվեի անցկացումը նշանակել են սեպտեմբերի 25-ին՝ անտեսելով կենտրոնական իշխանությունների կարծիքը: Բաղդադում հանրաքվեն ապօրինի են համարում, որի անցկացման դեմ է քվեարկել խորհրդարանը: Այս շաբաթ ԱՄՆ, Ֆրանսիայի, Գերմանիայի եւ ՄԱԿ ներկայացուցիչները Իրաքյան Քուրդիստանի ղեկավար Մասուդ Բարզանիի հետ հանդիպման ժամանակ առաջ են քաշել այլընտրանքային առաջարկ՝ կոչ անելով հանրաքվեն հետաձգել: