Երեւանում հոկտեմբերի 2-ին մեկնարկել է հայ-կանադական ՏՀՏ համաժողովը, որին մասնակցում են հայկական եւ միջազգային ՏՀՏ ոլորտի 20-ից ավելի կազմակերպությունների 70 ներկայացուցիչներ:
ՀՀ տրանսպորտի, կապի եւ տեղեկատվական տեխնոլոգիաների
Նախարարությունից NEWS.am-ին հայտնում են, որ ներկաներին ողջունեց Մոսկվայում Կանադայի դեսպանատան տնտեսական եւ առեւտրային հարցերով նախարար-խորհրդական Անիկ Գուլեն։
Նա նշեց, որ այս համաժողովն անցկացնելու գաղափարը ծնվել է դեռեւս մեկ տարի առաջ եւ համաժողովի անցկացմանը աջակցելու համար շնորհակալություն հայտնեց ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանին։
Նրա խոսքով՝ երկու պետությունների կառավարությունները լուրջ ուշադրություն են դարձնում այս ոլորտին, այն տնտեսության հենասյուներից է եւ մեծ ապագա ունի։
Համաժողովի մասնակիցներին ողջունեց նաեւ ՀՀ տրանսպորտի, կապի եւ տեղեկատվական տեխնոլոգիաների նախարարի տեղակալ Բորիս Դեմիրխանյանը։ Նա շնորհակալություն հայտնեց Հայաստանում Կանադայի դեսպանատանը համաժողովի կազմակերպման եւ անցկացման համար։ Նախարարի տեղակալը ներկայացրեց հայկական ՏՀՏ ոլորտի ձեռքբերումներն ու հնարավորությունները, հույս հայտնեց, որ համաժողովը կնպաստի այս ոլորտում հայ-կանադական գործակցության առավել ակտիվացմանն ու խորացմանը։
«Հայաստանի եւ Կանադայի ՏՀՏ ընկերությունների փորձը հնարավոր է օգտագործել երկու երկրների համար։ Կարեւոր է գտնել այն բանաձեւը, թե որտե՞ղ եւ ինչպե՞ս կարող ենք համագործակցել։ Մենք կանենք ամեն հնարավորը, որպեսզի աջակցենք ՏՀՏ նախաձեռնություններին՝ լինի դա պետական, թե մասնավոր մակարդակներում»,- ասաց Բորիս Դեմիրխանյանը։
Հայ-կանադական ՏՀՏ համաժողովը Հայաստանում անցկացվում է առաջին անգամ։
Այն նպատակ ունի քննարկելու եւ ներկայացնելու Հայաստանի ՏՀՏ ոլորտի ձեռքբերումները, գտնելու միջազգային համագործակցության նոր հնարավորություններ։
