Բոլոր ընկերությունների ստուգման ընթացակարգը հաստատվում է տարեկան ծրագրով. համակարգիչն է ընտրում այն ռիսկային ընկերություններին, որոնք պետք է ստուգումներ իրականացվեն։ Այս մասին այսօր՝ հոկտեմբերի 4-ին, լրագրողների հետ հանդիպման ժամանակ նշել է ՊԵԿ նախագահ Վարդան Հարությունյանը՝ անդրադառնալով հարցին, թե ինչով է պայմանավորված, որ ՊԵԿ-ը լայնածավալ ստուգումներ է սկսել Գագիկ Ծառուկյանին պատկանող ընկերություններում, որոշ ժամանակ առաջ էլ ստուգումներ էին տեղի ունեցել ՀՀԿ-ական պատգամավոր Միհրան Պողոսյանին պատկանող «Քեթրին Գրուպ»-ում:
Վարդան Հարությունյանի խոսքով, համակարգչի կողմից ստուգվող ընկերություններն ընտրելուց հետո, դրանք բաժանվում են ամիսների եւ հրապարակվում ՊԵԿ-ի կայքում։
Հարցին, ինչու են Ծառուկյանի ընկերությունները համարվել ռիսկային, ինչ չափանիշներով, նա պատասխանեց. «Ռիսկայնության չափորոշիչներն էլ է համակարգիչը որոշում։ Չափորոշիչները շատ են, թվարկել չեմ կարող, բայց հետո կարող եմ տրամադրել»:
Լրագրողներին հետաքրքրում էր նաեւ, թե ինչու հայտնի գործարարներին պատկանող ընկերությունները չեն հայտնվում օրինապահ հարկ վճարողների ցանկում: Վարդան Հարությունյանն այս առնչությամբ նշեց. «Կան որոշակի չափանիշներ, որոնցով ընտրվում են օրինապահ հարկ վճարողները: Միգուցե ձեր թվարկած ընկերությունները այդ չափանիշներին չեն բավարարել, դրա համար օրինապահ հարկատուի կարգավիճակ չեն ստացել»:
