Իրանի միջուկային ծրագրի շուրջ համաձայանգրից ԱՄՆ-ի հնարավոր դուրս գալը հարցականի տակ կդնի դրա իրականացումը: Թեհրանը լիարժեք իրավունք կունենա դադարեցնել պայմանավորվածության կատարումը, եթե Վաշինգթոնը վերականգնի Իրանի դեմ ավելի վաղ չեղարկած պատժամիջոցները: Այս մասին «ՌԻԱ Նովոստի»-ին տրված հարցազրույցում հայտնել է Ռուսաստանի ԱԳՆ Հյուսիսային Ամերիկայի բաժնի տնօրեն Գեորգի Բորիսենկոն:
«Եթե ԱՄՆ–ն իսկապես դուրս գա Գործողությունների համատեղ, համապարփակ պլանից, դա հարցականի տակ կդնի դրա իրականացման հնարավորությունը: Դա կարող է հանգեցնել նրան, որ Իրանը կհրաժարվի իր պարտականությունների կատարումից, հատկապես, եթե Միացյալ Նահանգները սկսի վերականգնել ավելի վաղ չեղարկած պատժամիջոցները Թեհրանի դեմ: Իրանը լիարժեք իրավունք կունենա դադարեցնել պայմանավորվածության կատարումը», — վստահ է ռուս դիվանագետը:
Նրա խոսքով՝ Մոսկվան կողմ է, որ իրանական ատոմի վերաբերյալ համաձայնագիրը պարտադիր ուժի մեջ մնա և իրականացվի բոլորի կողմից: Բորիսենկոն ընդգծել է, որ ռուսական կողմը բազմիցս այս տեսակետը տարբեր ձևաչափերով հասցրել է ամերիկացի գործընկերներին: «Ըստ մեր ըմբռնման՝ սա արդյունավետ, աշխատող պայմանավորվածություն է, որը բխում է բոլոր կողմերի շահերից», — պարզաբանել է Ռուսաստանի ԱԳՆ ներկայացուցիչը։
