Թեհրանը վստահեցնում է, որ ոչ մի հանգամանքներում չի արտադրի կամ ձեռք բերի միջուկային զենք։ Այս մասին հայտնել է Իրանի ԱԳ փոխնախարար Աբբաս Արակչին։
ՌԻԱ Նովոստիի փոխանցմամբ՝ ելույթ ունենալով միջուկային զենքի չտարածման հարցերով մոսկովյան համաժողովի ժամանակ՝ Արակչին հիշեցրել է, որ Իրանի միջուկային զենք ունենալու արգելքը, ըստ Համատեղ գործողությունների համընդգրկուն ծրագրի, անժամկետ բնույթ ունի ։
«Իրանը հաստատում է, որ ոչ մի պայմաններում, երբեւէ չի մշակի, ձեռք բերի կամ ձգտի ձեռք բերել միջուկային զենք։ Դա Իրանի մշտական, անժամկետ պարտավորությունն է, որը նա ստանձնել է Համատեղ գործողությունների համընգրկուն ծրագրի շրջանակում»,- ասել է Արակչին։
Դիվանագետի խոսքով՝ փաստաթղթով նախատեսված սահմանափակումների ժամկետի ավարտից հետո Իրանը չի սկսի մշակել միջուկային ռումբ, այլ կդառնա Միջուկային զենքի չտարածման մասին պայմանագրի նորմալ անդամ, ինչպես եւ ցանկացած այլ ոչ միջուկային տերություն։ «Մենք կստորագրենք Պայմանագրի բոլոր դրույթների տակ»,- ասել է Արակչին՝ շեշտելով, որ եթե բոլոր կողմերը կատարեն ՀԳՀԾ շրջանակում իրենց պարտավորությունները, ապա Իրանը վեց տարի հետո կվավերացնի լրացուցիչ արձանագրությունը։