Իրաքի Քուրդիստանում անկախության հանրաքվեն վաղաժամ տեղի ունեցավ: Նման կարծիք հոկտեմբերի 21-ին՝ մամուլի ասուլիսի ժամանակ, հայտնել է Ռուսաստանի Գիտությունների ակադեմիայի Արեւելագիտության ինստիտուտի Կենտրոնական Ասիայի եւ Կովկասի հետազոտությունների կենտրոնի գիտական աշխատող Անդրեյ Արեշեւը՝ պատասխանելով NEWS.am-ի թղթակցի՝ Քիրքուքի շուրջ իրավիճակի, հակամարտության հնարավոր սրման եւ հնարավոր հետեւանքների մասին հարցին:
Ըստ նրա՝ այդ մասին Ռուսաստանում արդեն հայտարարել են:
«Վիճելի տարածքներն, այսպես թե այնպես, պետք է Իրաքի կառավարության վերահսկողության տակ անցնեն: Եւ մենք տեսնում ենք, որ այս գործընթացը բավական ցավոտ անցավ: Համենայն դեպս, հիմա, այս փուլում », - ասել է փորձագետը՝ հավելելով, որ ամեն ինչ ընթանում է առանց լուրջ հետեւանքների եւ բախումների, որոնք կարող էին Մերձավոր Արեւելքում նոր ճգնաժամ առաջացնել:
Արեշեւը կարծում է, որ եթե տարածաշրջանում իրավիճակը վատթարանա, դա կարող է լուրջ վնաս հասցնել Հարավային Կովկասին, քանի որ կարող է փախստականների նոր անվերահսկելի հոսք սկսվել:
Միեւնույն ժամանակ, նա հույս է հայտնել, որ Բաղդադի եւ Էրբիլի միջեւ սկսված բանակցությունները նպաստում են առաջացած հակամարտության արագ լուծմանը:
Հիշեցնենք, որ հոկտեմբերի 16-ին Իրաքի վարչապետ Հեյդար ալ Աբադին ուժայիններին հրամայել էր Քիրքուք նահանգում ռազմակայաններում եւ պետական օբյեկտներում անվտանգություն ապահովել: Իրաքի Քուրդիստանի զինված ուժերը Իրաքի իշխանությունների գործողությունները «հարձակում» են անվանել եւ հայտարարել են, որ սա ոչ այլ ինչ է, քան «պատերազմի հայտարարում»:
Քրդերը նաեւ զգուշացրել են, որ Իրաքի վարչապետի կառավարությունը «բարձր գին» կվճարի հակամարտությունը նախաձեռնելու համար:
Նույն օրը Իրաքի ուժերը գրավեցին Քիրքուքը, ինչի մասին հաղորդոեց քրդական Rudaw հեռուստաալիքը:
Իրաքի վարչապետ Հեյդեր ալ Աբադին կարգադրել էր վիճելի տարածքներից հանել Քուրդիստանի դրոշը եւ բարձրացնել Իրաքի դրոշը:
Միեւնույն ժամանակ, «ՌԻԱ Նովոստի»-ն հաղորդել էր, որ քաղաքը առանց փեշմարգայի դիմադրության է վերցվել:
