Այսօր՝ դեկտեմբերի 15-ին, ժամը 18:30-ի սահմաններում Տաշիր-Մեծավան ավտոճանապարհի 4-րդ կիլոմետրի հատվածում «ԳԱԶ-2410» մակնիշի 68 ԼՍ 709 համարանիշի ավտոմքենայի վարորդը բախվել է իր ուղեմասով ընթացող ձիասայլին:
Ինչպես NEWS.am-ին հայտնեց ֆոտոլրագրող Գագիկ Շամշյանը, բախման հետեւանքով ձիասայլի վրա գտնվող Լոռու մարզի Մեծավան գյուղի բնակիչ 39-ամյա Ռոզա Նիկոլի Մարգարյանը սայլից վայր է ընկել եւ տեղում մահացել: Իսկ նրա ամուսինը՝ 49-ամյա Գուրամի Ալեքսանի Մարգարյանը մարմնական վնասվածքներ է ստացել ծոծրակի մասում (սալջարդ) եւ տեղափոխվել Տաշիրի քաղաքային հիվանդանոց:
«ԳԱԶ-2410»-ը վարել է նույն գյուղի բնակիչ 46-ամյա Հայկազ Անուշավանի Գրիգորյանը: Տեղի ունեցած վթարի առթիվ ոստիկանության քննչական գլխավոր վարչության Լոռու մարզի քննչական վարչության Տաշիրի քննչական բաժնում նյութեր են նախապատրաստվում:
