Գերմանական Volkswagen ընկերությունը մտադիր է լայնածավալ ներդրումներ կատարել Չինաստանում էլեկտրոմոբիլների արտադրության համար: Հաջորդ 7 տարիներին ընկերությունը մտադիր է 10 մլրդ դոլար ներդնել նոր էլեկտրոհիբրիդային ավտոմեքենաների մշակման համար, որպեսզի կատարի երկրում հաստատված պետական քվոտան: Այս մասին Գուանչժոում ցուցահանդեսի ժամանակ հայտնել է Volkswagen-ի չինական բաժնի պետ Յոհեմ Հայցմանը, հաղորդում է DW.-ն:
Մինչեւ 2025 թ. ընկերությունը նախատեսում է շուկայում մեքենաների 40 նոր մոդելներ գործարկել: Բացի այդ, չափանիշներին համապատասխանելու համար, Volkswagen-ը մինչեւ 2020 թվականը տարեկան պետք է էլեկտրոբիլների քանակը 400 հազարի հասցնի:
Հայցմանը վստահություն է հայտնել, որ Volkswagen-ն իր գործընկերների հետ համատեղ կկատարի էլեկտրոմոբիլների քվոտան: Այն նախատեսում է, որ մինչեւ 2019 թվականը Չինաստանում յուրաքանչյուր ընկերության արտադրված ավտոմեքենաների 10 տոկոսը պետք է լինեն էլեկտրական մեքենաներ եւ հիբրիդ մեքենաներ: Մինչեւ 2020 թվականը քվոտան պետք է հասնի մինչեւ 12 տոկոսի:
