Կառավարությունը պատրաստ է արձագանքել բիզնեսի յուրաքանչյուր խնդրի: Այս մասին, այսօր՝ նոյեմբերի 23-ին, «ՎԵՈՆ» ընկերությունների խմբի գլխավոր գործադիր տնօրեն Ժան Իվ Շարլիեի (Jean-Yves Charlier) գլխավորած պատվիրակության հետ հանդիպման ժամանակ նշել է ՀՀ վարչապետ Կարեն Կարապետյանը:
Կառավարությունից NEWS.am-ին հայտնում են, որ հյուրերն անդրադարձել են «ՎԵՈՆ» ընկերությունների խմբի Երեւանում անցկացված գլոբալ համաժողովի արդյունքներին եւ շնորհակալություն հայտնել ՀՀ կառավարությանը՝ հեռահաղորդակցության ոլորտում ստեղծված բարենպաստ պայմանների, բիզնեսի կողմից բարձրացվող խնդիրների լուծման եւ օպերատիվ արձագանքման համար:
Վարչապետը նշել է, որ կառավարությունը շահագրգռված է մասնավոր հատվածի զարգացմամբ ու ընդլայմամբ, հեռահաղորդակցության ոլորտում ներդրումների ավելացմամբ: Կարեն Կարապետյանն առաջարկել է ուշադրություն դարձնել նաեւ կրթության բնագավառին՝ այդպիսով սեփական բիզնեսի համար պատրաստելով նաեւ բարձրակարգ կադրեր: Նա ավելացրել է, որ պետությունը շահագրգռված է բիզնեսի եւ կրթական համակարգի համագործակցությամբ եւ վստահություն է հայտնել, որ այն կնպաստի տեղեկատվական տեխնոլոգիաների եւ հեռահաղորդակցության ոլորտում առկա մեծ ներուժի իրացմանը:
«Կառավարության այսօրվա նիստում եւս մենք փոփոխություններ կատարեցինք հարկային ու մաքսային վարչարարությանը վերաբերող օրենքներում, որոնք արտասահմանյան ներդրողների համար կարեւորագույն կարգավորումներ են նախատեսում: Համոզված ենք, որ այս փոփոխություններն ու կարգավորումները բիզնեսը լավագույնս զգալու է: Կառավարությունը պատրաստ է արձագանքել բիզնեսի յուրաքանչյուր խնդրի: Պետություն-մասնավոր հատված համագործակցության մասով եւս ծրագրում ենք նոր գործողություններ»,- ընդգծել է Կարեն Կարապետյանը:
Ժան Իվ Շարլիեն եւս կարեւորել է կրթական ծրագրերի իրականացումը եւ ընդգծել, որ «ՎԵՈՆ»-ը պատրաստվում է շարունակել Հայաստանում ներդրումային ծրագրերի իրականացումը: Նրա խոսքով, արդեն իսկ պատրաստ են 2018 թվականի համար Հայաստանում նախատեսված միջոցառումները:
Հանդիպմանն անդրադարձ է կատարվել նաեւ Գյումրիում նախատեսվող ծրագրերին, մասնավորապես, հաղորդակցության ենթակառուցվածքների վերականգնման աշխատանքներում «ՎԵՈՆ»-ի ներգրավման հնարավորություններին:
