Հայաստանը վերջապես ստորագրեց Եվրամիության հետ Համապարփակ եւ ընդլայնված գործընկերության մասին համաձայնագիրը: Արտգործնախարար Էդվարդ Նալբանդյանն ու Եվրամիության արտաքին քաղաքականության հարցերի գերագույն հանձնակատար Ֆեդերիկա Մոգերինին փաստաթուղթը ստորագրեցին նախագահ Սերժ Սարգսյանի եւ Եվրոպական խորհրդի ղեկավար Դոնալդ Տուսկի ներկայությամբ:
Դոնալդ Տուսկը փաստաթուղթը հավակնոտ է կոչել, իսկ Սերժ Սարգսյանը նշել է, որ այն սոսկ նոր իրավական փաստաթուղթ չէ, այլ մարդու իրավունքների եւ հիմնարար ազատությունների վրա խարսխված այն արժեհամակարգի արտացոլումը, որը դավանում է Հայաստանը:
Հայաստանի եւ ԵՄ-ի միջեւ Ասոցացման համաձայնագրի շուրջ բանակցությունները սկսվել էին 2010 թվականին, սակայն 2013 թվականի սեպտեմբերին Հայաստանը հրաժարվեց համաձայնագիր կնքել ԵՄ-ի հետ եւ հայտարարեց ԵՏՄ-ին միանալու մասին: Չնայած դրան՝ 2015 թվականին ԵՄ-ն եւ Հայաստանը նորից բանակցություններ սկսեցին՝ արդեն նոր համաձայնագիր կնքելու շուրջ: Այս տարվա մարտին այն նախաստորագրվեց, իսկ այսօր արդեն ստորագրվեց: Համաձայնագրով նախատեսվում է քաղաքական երկխոսության ամրապնդում: Կողմերը նաեւ կձգտեն ընդլայնել տնտեսական եւ ոլորտային համագործակցությունը, կդյուրացվի մարդկանց տեղաշարժը՝ հետագայում վիզայի ազատականացման շուրջ բանակցելու հնարավորությամբ: Այս փաստաթղթի տնտեսական բաղադրիչը, սակայն, էականորեն զիջում է Ասոցացման համաձայնագրին:
Իսկ այս օրերին Բրյուսելում է ո՛չ միայն Հայաստանի նախագահի գլխավորած պատվիրակությունը: Բելգիայի մայրաքաղաք են ժամանել «Արեւելյան գործընկերության» ծրագրի մյուս պետությունների ղեկավարները՝ բացառությամբ Բելառուսի նախագահի: Լիտվայի նախագահը կարծում է, թե «Արեւելյան գործընկերության» գագաթնաժողովին Ալեքսանդր Լուկաշենկոյի բացակայությունը Մոսկվայի որոշումն է:
Իսկ գագաթնաժողովում հիմնական ինտրիգն ամփոփիչ հռչակագրի ստորագրման շուրջ էր: Բրյուսելում մտահոգված էին, որ այն կարող է տապալվել, քանի որ Հայաստանն ու Ադրբեջանը չէին կարողանում համաձայնության գալ ղարաբաղյան հակամարտության հարցով ձեւակերպումների շուրջ: Սերժ Սարգսյանը գագաթնաժողովի մեկնարկից առաջ լրատվամիջոցներից մեկին ասել է, որ Հայաստանը չի պատրաստվում արգելափակել հռչակագրի ստորագրումը, չնայած Ադրբեջանը ձգտում է բարդ ձեւակերպումներ առաջ մղել:
Գագաթնաժողովի ամփոփիչ հռչակագիրը, այնուամենայնիվ, ընդունվեց: Դրանում, սակայն, ոչ մի կոնկրետ հակամարտություն չի նշվում եւ կոչ է արվում վերականգնել տարածաշրջանում չլուծված հակամարտությունների խաղաղ կարգավորմանն ուղղված ջանքերը՝ ելնելով միջազգային իրավունքի նորմերից եւ սկզբունքներից, ինչն արտահայտում է Հայաստանի դիրքորոշումը:
Կայացավ «Հայաստան» համահայկական հիմնադրամի ամենամյա դրամահավաքը: Հեռուստամարաթոն-2017-ի ընթացքում 12 մլն 505.456 դոլարի նվիրատվություն եւ նվիրատվության խոստում է եղել: Այս տարվա հեռուստամարաթոնի թեման «Բերքառատ Արցախն» է: Նվիրաբերված միջոցներով Արցախի տարածքում խորքային հորերի հորատում կկատարվի, նոր ոռոգման ցանց կկառուցվի, ինչպես նաեւ արեւային էներգետիկ կայաններ կտեղադրվեն: Նշենք, որ 25 տարվա ընթացքում «Հայաստան» հիմնադրամը նվիրատուների շնորհիվ ավելի քան 50.000 ծրագիր է իրականացրել Հայաստանում եւ Արցախում: Իրականացված ծրագրերն ընդհանուր առմամբ 350 միլիոն դոլար են արժեցել: Այդ միջոցներով կառուցվել են ճանապարհներ, ջրատարներ, գազամուղ է անցկացվել, կառուցվել եւ վերանորոգվել են դպրոցներ ու մանկապարտեզներ, մշակութային եւ մարզական կենտրոններ:
«Սասնա ծռեր» խմբի անդամ Պավլիկ Մանուկյանին նոր մեղադրանք է առաջադրվել: Փաստաբան Ինեսսա Պետրոսյանը հայտնել է, որ Մանուկյանին մեղադրանք է առաջադրվել դատարանի նկատմամբ անհարգալից վերաբերմունքի համար: Հիշեցնենք, որ «Սասնա ծռերի» գործով դատական նիստին Պավլիկ Մանուկյանը դատավոր Արտուշ Գաբրիելյանին «ցռան մոզի» էր անվանել: Գործով նախաքննությունն այսօր ավարտվել է, Մանուկյանը որպես մեղադրյալ է ներգրավվել, դատավոր Գաբրիելյանը, սակայն, տուժող չի ճանաչվել: Որպես վկա հարցաքննել են դատական կարգադրիչներին:
Եգիպտոսում ահաբեկչություն է տեղի ունեցել: Սինայի թերակղզում մզկիթներից մեկում պայթյուն է որոտացել: Վերջին տվյալներով՝ շուրջ 190 մարդ է զոհվել, 125 վիրավոր կա: Ահաբեկիչները պայթուցիկ սարքը գործարկել են ուրբաթօրյա աղոթքի ժամանակ: Նրանք 4 մեքենաներով շրջապատել են մզկիթը, գործի են դրել պայթուցիկը, իսկ հետո անկանոն կրակ բացել մարդկանց ուղղությամբ: Դեռեւս որեւէ խմբավորում չի ստանձնել ահաբեկչության պատասխանատվությունը: Եգիպտոսի իշխանությունները եռօրյա սուգ են հայտարարել՝ ի հիշատակ ահաբեկչական հարձակման զոհերի:
Զիմբաբվեն նոր նախագահ ունի: Մայրաքաղաք Հարարեի Ազգային մարզադաշտում Էմերսոն Մնանգագվան բազմահազար քաղաքացիների ներկայությամբ երդում է տվել եւ խոնարհվելով Աստվածաշնչին՝ պաշտոնապես ստանձնել է նախագահի պաշտոնը: 75-ամյա Մնանգագվան Զիմբաբվեում քաղաքական ճգնաժամի ֆոնին նոյեմբերի սկզբին հեռացվել էր առաջին փոխնախագահի պաշտոնից: Նախկին նախագահ Ռոբերտ Մուգաբեն նրան մեղադրել էր իշխանությունը զավթելու նպատակով դավադրություն կազմակերպելու մեջ: Ըստ տեղեկությունների՝ Մուգաբեն այս քայլին դիմել է կնոջ՝ Գրեյսի ազդեցությամբ, որը մտադիր էր ամուսնուց հետո զբաղեցնել նախագահի պաշտոնը: Իսկ Մնանգագվան արդեն հայտնել է, որ պետության ղեկավարի ընտրությունները, ծրագրվածի պես, կկայանան հաջորդ տարի:
Դոլարն ու եվրոն շարունակում են թանկանալ: Նոյեմբերի 24-ին դոլարի փոխարժեքը կազմել է 483 դրամ, եվրոյինը՝ 574, ռուբլունը՝ 8 դրամ 28 լումա, ֆունտինը՝ 645 դրամ:
Նոյեմբերի 25-ի գիշերը եւ առավոտյան ժամերին հանրապետության շրջանների զգալի մասում թույլ ձյուն է սպասվում, 26-29-ը՝ առանց տեղումների եղանակ: Երեւանում նույնպես վաղը հնարավոր է թույլ ձյուն: Մայրաքաղաքում գիշերը կդիտվի -2-4 աստիճան ցուրտ, ցերեկը՝ նույնքան տաքություն:
