«Սասնա ծռեր» խմբի գործով նիստին այսօր` դեկտեմբերի 4-ին, հրապարակվում են ամբաստանյալների մեղադրանքների եզրափակիչ մասերը: Այս գործով դատաքննությունը սկսվել է անցած նիստին: Նախագահող դատավոր Արտուշ Գաբրիելյանը նիստի մեկնարկին տեղեկացրեց, որ ամբաստանյալներից Կարո Եղնուկյանը վատ ինքնազգացողություն ունի եւ չի կարող մասնակցել դատական նիստին, նա նշեց, որ Կարո Եղնուկյանն ունի բարձր արյան ճնշում եւ խնդրել է նիստն առանց իր ներկայության անցկացնել: Կարո Եղնուկյանի շահերի պաշտպան Տիգրան Հայրապետյանն էլ հայտարարեց, որ իր պաշտպանյալին այդպիսի առողջական վիճակում ՔԿՀ-ից դատարան տեղափոխելը անմարդկային վերաբերմունք է եւ դեմ չէ, որպեսզի դատական նիստն անցկացվի առանց իր պաշտպանյալի ներկայության:
Որից հետո Արտուշ Գաբրիելյանը հայտարարեց` այժմ կհրապարակվի ամբաստանյալներից Աշոտ Պետրոսյանի մեղադրական եզրակացությունը եւ միանգամից իրեն ուղղեց. «Վայ, մեղադրանքի եզրափակիչ մասը: Մեկ-մեկ էլ մենք ենք շփոթվում ինչ անենք` դուք շատ եք, մենք մենակ»:
Նշենք, որ Արտուշ Գաբրիելյանը քննում է «Սասնա ծռեր» խմբի անդամներ Արմեն Լամբարյանի, Աշոտ Պետրոսյանի, Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Մանվել Աթոյանի, Վարդգես Գեւորգյանի, Կարո Եղնուկյանի եւ Խաչատուր Գիչյանի մասով գործը:
Հիշեցնենք, որ «Սասնա ծռեր» խմբի գործով դատաքննությունը մի քանի ամիս շարունակ չէր սկսվում, նիստերն անընդհատ տապալվում էին, որից հետո որոշում կայացվեց գործը բաժանել 3 մասի:
«Սասնա ծռեր» խմբի 11 անդամի մասով գործը քննում է Արտուշ Գաբրիելյանը, իսկ անջատված մասերով երկու գործը քննում են Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյանն ու Էրեբունի եւ Նուբարաշեն վարչական շրջանների ընդհանուր իրավասության դատարանի նախագահ Արթուր Օհանյանը: