ՆԱՏՕ-ն պատրաստվում է խորացնել Եվրամիության հետ համագործակցությունը: ԱԳ նախարարների մակարդակով առաջիկա հանդիպմանը խոսք կգնա նոր նախագծերի, առաջին հերթին լոգիստիկայի ոլորտում փոխգործակցության մասին: Այս մասին հայտնել է Հյուսիսատլանտյան դաշինքի գլխավոր քարտուղար Յենս Ստոլտենբերգը:
«Անկանխատեսելի իրավիճակում մենք անվտանգության ոլորտում պետք է ունենանք զորքերի եւ սպառազինության արագ տեղափոխման հնարավորություն»,- ընդգծել է նա:
ԵՄ-ի եւ ՆԱՏՕ-ի համատեղ նախագծերի նոր փաթեթը տասնյակից ավելի կետեր կպարունակի, հայտնում է dpa-ն: Դեկտեմբերի 5-6-ին Բրյուսելում ՆԱՏՕ-ի կենտրոնակայանում հանդիպմանը կմասնակցեն ռազմական դաշինքի երկրների ԱԳ նախարարները: Նրանք նաեւ կքննարկեն ՆԱՏՕ-ի անդամակցությանը հավակնող երկրներում՝ Վրաստանում, Մակեդոնիայում, ինչպես նաեւ Բոսնիայում եւ Հերցեգովինայում բարեփոխումների իրականացման ընթացքը:
2016-ի դեկտեմբերին ԵՄ-ն եւ ՆԱՏՕ-ն 7 ոլորտներում համագործակցության նախագծերի 42 փաթեթ էին ընդունել: Ստորագրված փաստաթղթով նախատեսվում էր համագործակցություն ծովում անվտանգության ուժերի ամրապնդման, հիբրդային պատերազմներին եւ կիբերհարձակումներին հակազդելու, ինչպես նաեւ համատեղ ռազմական հետազոտությունների եւ վարժանքների ոլորտներում: