Երեւանում հերթական սպանությունն է տեղի ունեցել: Ոստիկանությունն ահազանգ է ստացել մայրաքաղաքի թաղամասերից մեկում այրվող ավտոմեքենայի մասին: Իրավապահները Բաբաջանյան փողոցում «Նիսան»-ի սրահում տղամարդու դի են հայտնաբերել՝ հրազենային վնասվածքներով: Սպանվածը 38-ամյա Արշակ Գալստյանն է: Դեպքի վայրում նաեւ 6 պարկուճ են հայտնաբերել:

Կասկածյալի ինքնությունը կարճ ժամանակում ճշտվել է: Արդեն բերման ենթարկվածներ կան, սակայն, իրավապահների տեղեկացմամբ, հանցագործությունը կատարելու մեջ կասկածվողին դեռ որոնում են: Պարզվել է նաեւ, որ Արշակ Գալստյանի ուղղությամբ կրակել են մեկ այլ ավտոմեքենայից: Ոստիկանությունը կասկածյալի եւ բերման ենթարկվածների անունները, ինչպես նաեւ հանցագործության պատճառների մասին ոչինչ չի հայտնում:

Ազգային ժողովն այսօր ընդունել է նախօրեին քննարկված մի քանի օրինագծեր ու նոր նախագծեր քննարկել: Խորհրդարանն 90 կողմ ձայնով վավերացրել է Հայաստանի եւ ՆԱՏՕ-ի միջեւ համագործակցության համաձայնագիրը: Դրանով 1.5 մլն եվրո կտրամադրվի Հայաստանի պաշտպանության նախարարությանը՝ պիտանելիությունից դուրս եկած ռազմական տեխնիկան ոչնչացնելու համար: 92 կողմ ձայնով պատգամավորներն ընդունել են նաեւ Ռուսաստանից 100 մլն դոլարի վարկ ստանալու մասին համաձայնագիրը: Այդ գումարով էլ ռուսական արտադրության ռազմական նշանակության արտադրանք ենք ձեռք բերելու:

Իսկ ընտանեկան բռնության մասին օրինագծի քննարկումը բուռն է անցել: «Ծառուկյան» խմբակցությունից Գեւորգ Պետրոսյանը կարծում է, որ ընտանիքում համերաշխության վերականգնումն օրենքով չի կարող լինել: Օրինագիծը Պետրոսյանին նաեւ սովետական թաղայինների ինստիտուտն է հիշեցրել, եւ պատգամավորը կոչ է արել թույլ չտալ, որ ոստիկանները խառնվեն հայ ընտանիքի գործերին: Փոխարենը, ըստ նրա, լավ կլիներ բռնություն եւ սպանություն քարոզող հաղորդումներն արգելել:

Հրայր Թովմասյանն էլ կոչ է անում օրինագիծը չմեկնաբանել այնպես, թե դրա ընդունումից հետո ընտանիքի անդամներն արդեն այս օրենքի միջոցով են շփվելու: Բայց դրա ընդունումն անհրաժեշտություն է, քանի որ, պատգամավորի հավաստմամբ, Հայաստանում, ցավոք, կան ընտանիքներ, որտեղ կնոջը ծեծելն առավոտյան ատամները մաքրելու պես բան է դարձել:

«Ելք»-ը կողմ է օրինագծին, բայց Նիկոլ Փաշինյանը վերապահումներ ունի ելույթներում հնչած ձեւակերպումների շուրջ: Ասում է՝ պետք չէ ամեն ինչին ասել ազգային ավանդույթ եւ կուրորեն ընդունել դրանք: Նիկոլ Փաշինյանն այսօր կրկին խոսել է նաեւ թանկացումներից՝ հայտարարելով. 2018 թվականը թանկացումների տարի է լինելու: Ընդ որում, պատգամավորի խոսքով, սա ընդունում է նաեւ կառավարությունը, քանի որ հաջորդ տարվա բյուջեի նախագծով 4%-ի գնաճ է կանխատեսում, բայց գերադասում է չխոսել այդ մասին:

Կիեւում Միխայիլ Սահակաշվիլիի մասնակցությամբ իրադարձությունները նոր զարգացումներ են ստացել: Չնայած ցրտին ու ձյան տեղումներին՝ Վրաստանի նախկին նախագահի կողմնակիցները Ռադայի մոտ վրանային ճամբար ստեղծել: Այստեղ վաղ առավոտյան ակտիվիստների եւ ոստիկանների միջեւ բախումներ են գրանցվել, ուր իրավապահները եկել էին՝ քաղաքական գործչին հարցաքննության տանելու: Ոստիկաններն արցունքաբեր գազ են կիրառել, ճամբարից հայտնել են բախումների հետեւանքով մի քանի տուժածի մասին: Ըստ տեղեկությունների՝ ակտիվիստներն էլ հարձակվել են ոստիկանների վրա, ինչից հետո վերջինները նահանջել են:

Ավելի ուշ Սահակաշվիլին հայտարարել է, որ իրավապահները պարզապես շփոթել են վրաններն ու հարձակվել հարեւան վրանում քնած ակտիվիստների վրա, դաժան ծեծի ենթարկել նրանց: Նա նաեւ դիմել է Ուկրաինայի նախագահին՝ նշելով, որ իրենք խաղաղ ակցիա են անցկացնում եւ կոչ անելով զերծ մնալ սադրանքներից ու մարդկանց չստիպել հակադարձել: Ավելի ուշ տեղեկություն տարածվեց նաեւ, որ Սահակաշվիլին համախոհների հետ գրավել է Գերագույն ռադայի հանձնաժողովներից մեկը: Այս փաստով քրեական վարույթ է հարուցվել:

Մեկնաբանելով այս իրադարձությունները՝ նախագահ Պյոտր Պորոշենկոն հայտարարել է, թե ցնցված է կատարվածի առիթով: Նա նաեւ նշել է, թե Ուկրաինայում իրավիճակի ապակայունացման փորձը Մոսկվայի ձեռքի գործն է: Հիշեցնենք, որ դեկտեմբերի 5-ի առավոտյան ուկրաինացի ուժայինները որոշել էին խուզարկել Սաակաշվիլիի Կիեւի բնակարանը: Վրացի գործիչը շենքի տանիք էր բարձրացել՝ սպառնալով ցած նետվել: Օդեսայի նախկին նահանգապետին իջեցրեցին տանիքից, ձերբակալեցին, բայց տեղ հասցնել չկարողացան. գործչի համախոհները հարձակվեցին Սահակաշվիլիին տեղափոխող մեքենայի վրա ու ազատեցին նրան:

Հայկական շուկայում ադրբեջանական արտադրության կոնֆետներ են հայտնվել: Տեղեկությունը հրապարակվել է մամուլում, իսկ գյուղնախարարության Սննդի անվտանգության պետական ծառայության տեսուչներն արդեն շրջայցեր են կատարել խանութներում: Հրապարակման հեղինակից ճշտել են խանութի հասցեն, սակայն ո՛չ այնտեղ, ո՛չ էլ հարակից խանութներում ադրբեջանական արտադրության կոնֆետներ չեն գտել: Ծառայությունը սպառողներին հորդորել է խախտումներ հայտնաբերելու դեպքում անմիջապես զանգահարել իրենց «Թեժ գծին»: Խնդրով զբաղվում է նաեւ ՊԵԿ-ը: Նշենք, որ ադրբեջանական կոնֆետներ տարիներ առաջ իրացվել են նաեւ Վանաձորում. դրանք Հայաստան էին բերել Թբիլիսիից: Հայկական շուկա նաեւ ադրբեջանական խնձոր ու թեյ է հասել:

74 տարեկանում կյանքից հեռացել է «ֆրանսիական ռոքի կուռք» Ջոնի Հոլիդեյը: Ամիսներ շարունակ նա պայքարում էր թոքերի քաղցկեղի դեմ: Հայրենիքում Հոլիդեյին «ֆրանսիական ռոքի վերջին լեգենդ» էին անվանում: Երաժշտի մահվան մասին հայտնել է կինը՝ Լետիսիան: Ջոնի Հոլիդեյը, որի իրական անունն է Ժան-Ֆիլիպ Սմետ, կարիերայի ընթացքում ավելի քան 400 համերգային շրջագայություն է կատարել, 115 մլն սկավառակ վաճառել, նրա 18 ալբոմներ պլատինե են դարձել: Ջոնի Հոլիդեյը երաժշտական կարիերան սկսել է 1960-ական թվականներին: Հոլիդեյը, որին ֆրանսիացի Էլվիս Փրեսլի էին կոչում, ֆրանսիական ռոք-ըն-ռոլի առաջին կատարողն էր: Երաժիշտը նաեւ մի շարք զուգերգեր է ձայնագրել Շառլ Ազնավուրի հետ: Ջոնի Հոլիդեյի առաջին կինը, ի դեպ, ֆրանսիահայ հայտնի դերասանուհի եւ երգչուհի Սիլվի Վարդանն էր. զույգը որդի ունի:

Դոփինգի հետ կապված սկանդալը հանգուցալուծվեց. ռուսական օլիմպիական պատվիրակությունը զրկվեց 2018 թվականի ձմեռային Օլիմպիական խաղերին մասնակցելու իրավունքից: Միջազգային օլիմպիական կոմիտեն որակազրկել է Ռուսաստանի Ազգային օլիմպիական կոմիտեին. արդյունքում ռուսաստանցի որեւէ պաշտոնյա օլիմպիական հավատարմագրում չի ստանա, իսկ այդ երկրի սպորտի նախարար, փոխվարչապետ Վիտալի Մուտկոն Օլիմպիական խաղերի հավատարմագրումից ցմահ է զրկվել: Օլիմպիական ուղեգիր նվաճած եւ դոփինգային սկանդալի հետ առնչություն չունեցող ռուսաստանցի մարզիկները կկարողանան օլիմպիադային մասնակցել չեզոք դրոշի ներքո, իսկ հաղթանակի դեպքում պարգեւատրության ժամանակ Ռուսաստանի հիմնի փոխարեն կհնչի օլիմպիական հիմնը: ՄՕԿ-ի որոշման պատճառը դոփինգային սկանդալն է: Հետաքննության շրջանակում ուսումնասիրություններ են արել եւ պարզել, որ Ռուսաստանը դոփինգի կիրառման պետական ծրագիր է ունեցել: Հիշեցնենք, որ 2018թ. ձմեռային Օլիմպիական խաղերը փետրվարի 9-ից 25-ը կընդունի Հարավային Կորեայի Պհենչհան քաղաքը:

Դեկտեմբերի 6-ին դոլարը շարունակել է թանկանալ, իսկ եվրոն եւ ռուբլին թուլացել են: Դոլարի փոխարժեքը կազմել է 484 դրամ, եվրոյինը՝ 573, ռուբլունը՝ 8 դրամ 22 լումա, ֆունտինը՝ 649 դրամ:

Դեկտեմբերի 7-ին Վայոց ձորում, Սյունիքում եւ Արցախում տեղումներ են սպասվում, 8-ին թույլ ձյուն կտեղա հանրապետության ամբողջ տարածքում: Օդի ջերմաստիճանը 8-10 աստիճանով կնվազի: Երեւանում վաղը տեղումներ չեն լինի: Մայրաքաղաքում գիշերը կդիտվի 0-2 աստիճան ցուրտ, ցերեկը՝ նույնքան տաքություն: