Դեկտեմբերի 20-ին Գարեգին Բ Կաթողիկոսն ընդունել է Եվրախորհրդարանի պատգամավոր, Հայաստանի հարցերով զեկուցող Տոմաշ Պորեբային, ում ուղեկցել է ԱԺ պատգամավոր Արտակ Զաքարյանը:
Մայր Աթոռից NEWS.am-ին հայտնում են, եր իր խոսքում Կաթողիկոսն անդրադարձել է 1915թ. Հայոց ցեղասպանության եւ խորհրդային աստվածամերժության տարիներին Հայ առաքելական եկեղեցու կրած դժվարություններին, որոնց հետեւանքները դեռ զգալի են նաեւ նորօրյա ժամանակներում։ Նորին Սրբությունն անդրադարձել է նաեւ Եկեղեցի-պետություն հարաբերություններին եւ այն համագործակցությանը, որ իրականացվում է տարբեր ոլորտներումՙ ի բարօրություն ժողովրդի:
Հանդիպման ընթացքում խոսվել է նաեւ տարածաշրջանային տարբեր խնդիրների եւ դրանց հաղթահարմանն ուղղված Հայ Եկեղեցու ջանքերի մասին։ Մասնավոր անդրադարձ է կատարվել Լեռնային Ղարաբաղի հակամարտության խաղաղ կարգավորման, Ադրբեջանում հայկական մշակութային արժեքների ոչնչացման եւ Վրաստանում հայոց եկեղեցիների վերադարձման, ինչպես նաեւ Վիրահայոց թեմի իրավական կարգավիճակի խնդիրներին: