ՆԱՏՕ-ն այս կամ այն երկրի դեմ գործող դաշինք չէ, այլ միություն, որը պաշտպանում է միջազգային իրավունքի կարեւոր որոշ սկզբունքներ եւ նորմեր: Այս մասին դեկտեմբերի 18-ին Երեւանի պետական համալսարանում հանդիպման ժամանակ հայտարարել է ՆԱՏՕ-ի գլխավոր քարտուղարի տեղակալ Ռոուզ Գեթեմուլերը:
«ՆԱՏՕ-ն զբաղված է նոր ժամանակակից սպառնալիքներով, օրինակ՝ ահաբեկչության դեմ պայքարով, որը հիանալի օրինակ է այն բանի, թե ինչպես է Հյուսիսատլանտյան դաշինքը հանդես գալիս ոչ պետական դերակատարների դեմ, որոնք բռնությունն օգտագործում են անմեղ քաղաքացիների նկատմամբ»,-նշեց նա:
Խոսելով ժամանակակից սպառնալիքների մասին՝ ՆԱՏՕ-ի գլխավոր քարտուղարի տեղակալը ընդգծեց կիբերհարձակումները որպես սպառնալիքի նոր տեսակ, որին բախվում է ՆԱՏՕ-ն ժամանակակից աշխարհում:
«Մենք չենք ցանկանում Սառը պատերազմի վերադարձը: Ներկայումս մենք տեսնում ենք, որ աշխարհը փոխվել է: Կան տարբեր մարտահրավերներ եւ սպառնալիքներ, եւ ՆԱՏՕ-ն պետք է մտածի ինչպես պաշտպանվել ավելի լայն շրջանակի խնդիրներից»,-ավելացրեց նա:
