Հայկական կողմը մշտապես ասել է, որ պատրաստ է Թուրքիայի հետ հարաբերությունների կարգավորմանը առանց որեւէ նախնական պայմանի: Այս մասին NEWS.am-ի հետ զրույցում ասաց ԱԺ Եվրոպական ինտեգրման հարցերով մշտական հանձնաժողովի նախագահ Նաիրա Զոհրաբյանը՝ ի պատասխան այն հարցին, թե հնարավո՞ր է ինչ-որ նախադրյալների առաջացումը հայ-թուրքական հարաբերությունների կարգավորման ուղղությամբ տեղաշարժի համար:
Նրա խոսքով՝ Թուրքիայի քաղաքական վերնախավի դիրքորոշումը եւ երկրի նախագահ Ռեջեփ Թայիփ Էրդողանի պահվածքը ոչ միայն ավելի ապաքաղաքական եւ էքստրավագանտ են դառնում, այլ նաեւ անկանխատեսելի: «Բրյուսելում վերջերս հանդիպել եմ եվրոպացի բավականին ազդեցիկ քաղաքական գործիչների հետ, եւ նրանք պարզապես տարակուսած են Էրդողանի պահվածքից»,- նշեց Զոհրաբյանը՝ հավելելով, որ Եվրամիությունը բավականին հստակ դիրքորոշում է արտահայտել Թուրքիայի նախագահ Էրդողանի քաղաքականության վերաբերյալ: Նա ընդգծեց, որ այս ֆոնին մոտ ապագայում ինքը Հայաստանի եւ Թուրքիայի միջեւ դիրքորոշումների մերձեցման որեւէ հեռանկար չի տեսնում, առավել եւս, որ Էրդողանի դիրքորոշումն ավելի խիստ է դանում:
Հիշեցնենք, որ Հայաստանի եւ Թուրքիայի միջեւ դիվանագիտական հարաբերություններ չկան, իսկ հայ-թուրքական սահմանը թուրքական կողմի նախաձեռնությամբ փակ է 1993 թվականից: 2 երկրների միջեւ հարաբերությունների կարգավորման գործընթացը 2008 թվականի աշնանից նախաձեռնել է նախագահ Սերժ Սարգսյանը: 2009-ի հոկտեմբերի 10-ին 2 երկրների ԱԳ նախարարները Ցյուրիխում ստորագրել են «Դիվանագիտական հարաբերությունների հաստատման մասին» եւ «Երկկողմ հարաբերությունների զարգացման մասին» արձանագրություններ: Սակայն հետագայում Անկարան սկսեց նախապայմաններ առաջադրել ղարաբաղյան հակամարտության մասով, ինչը բերեց հայ-թուրքական հարաբերությունների կարգավորման գործընթացի փաստացի խզման: Արձանագրությունների վավերացման հարցը սառեցված է: