Պետական պարտքի, այն կուտակելու, տեղաբաշխելու եւ մարելու համար կարող է պատասխանատու լինել միայն Հայաստանի կառավարությունը, եւ ուրիշ ոչ մեկը: Այս մասին NEWS.am-ի հետ զրույցում ասաց «Այլընտրանք» հետազոտական կենտրոնի ղեկավար, տնտեսագիտության դոկտոր Թաթուլ Մանասերյանը:
Նրա խոսքով՝ պետական պարտքը բաժանվում է ըստ տարիների եւ ամիսների: «Այնպես որ՝ պետական պարտքի կառուցվածքը կառավարության մոտ է գտնվում: Կառավարությունը երբեք տեղեկություններ չի ներկայացրել պետական պարտքի միջոցների օգտագործման մասին»,- պարզաբանեց Մանասերյանը՝ հավելելով, որ գործադիր իշխանությունը նույնկերպ մանրամասն տեղեկություններ չի ներկայացրել պետական պարտքի օգտագործման անդրադարձման մասին: Փորձագետի կարծիքով՝ հենց այս պատճառով Հայաստանում պետական պարտքի չափի հետ կապված վիճակն անմխիթարական է:
Նշենք, որ 2017-ին Հայաստանի պետական պարտքը կազմել է 6 մլրդ 813 մլն դոլար, իսկ արդեն 2018-ին կկազմի 7 մլրդ 209 մլն դոլար: